Fələstinin HƏMAS Hərəkatı Qətər və Türkiyənin təzyiqi altında Qəzza zolağında münaqişəyə son qoymaq üçün ABŞ-nin təklifləri ilə razılaşa bilər.
Teleqraf xəbər verir ki, bu barədə Amerikanın “The New York Times” (NYT) qəzeti məlumat yayıb.
“Qrup və onun rəhbərliyi müharibədən o qədər yorulub və müsəlman ölkələrinin, o cümlədən Qətər və Türkiyənin o qədər açıq təzyiqi ilə üzləşiblər ki, sövdələşməyə razı ola bilərlər”, - nəşr yazıb.
Qəzet qeyd edib ki, HƏMAS ABŞ-nin təklifini qəbul etsə də, rədd etsə də, artıq zolaqda nə vaxtsa malik olduğu təsir gücünə malik olmayacaq, nə də onu idarə edə biləcək.
NYT həmçinin hesab edir ki, HƏMAS-ın sazişi rədd etməsi İsraillə münaqişədən ən çox əziyyət çəkən fələstinlilərin özləri arasında narazılıq yaradacaq. “Bəzi qəzzalılar HƏMAS-ı öz siyasi varlığını qorumaq üçün onların hesabına müharibə aparmaqda günahlandırır”, - nəşr əlavə edib.
