Ermənistan Baş naziri Nikol Paşinyan "Zəngəzur dəhlizi" ifadəsini dilindən düşürmür. Daha doğrusu, baş nazir bu ifadənin işlədilməsinin "yanlış" olduğunu iddia edir: "Azərbaycan “Zəngəzur dəhlizi” deyir? Qoy desin, söhbət Ermənistan ərazisindən getmir. Min dəfə üzr istəyirəm, bəlkə də, Albert Eynşteynin adını qoymağa qərar veriblər, qoy versinlər, bunun bizim suveren ərazimizlə heç bir əlaqəsi yoxdur, imzalı kağızım var".
O iddia edib ki, “Zəngəzur dəhlizi” termini Ermənistanla bağlı deyil: "Horadiz-Zəngilan yolu daha uzundur, “Zəngəzur dəhlizi” deyirlər, desinlər, problemimiz yoxdur. Razılaşdırılmış ad TRIPP marşrutudur". Qeyd edək ki, Ermənistanın Zəngəzur vilayətindən keçəcək yol beynəlxalq lüğətdə də daha çox "Zəngəzur dəhlizi" kimi təqdim olunur.
Siyasi şərhçi Həsrət Rüstəmov Sherg.az-a deyib ki, N.Paşinyanın Zəngəzur dəhlizinə reaksiya verməsi yeni məsələ deyil. Ekspert vurğulayıb ki, Paşinyan hökuməti bu ifadənin siyasi termin olaraq beynəlxalq leksikona düşməsindən əvvəllər də narahatlıqlarını dilə gətiriblər:
"Hazırda daha əsəbi reaksiya vermələrinin əsas səbəbi məncə seçkilərdir. Paşinyan onsuz da aşağı olan reytinqinin qayğısına qalmaqla məşğuldur və bu, başadüşüləndir. Eyni zamanda bu, Moskvanın sifarişi də ola bilər. Son vaxtlar regionda siyasi fəallığını artıran Rusiya, görünür, erməni hakimiyyətini qızışdıraraq bu nəqliyyat dəhlizinin açılmasını əngəlləmək istəyir. Vaşinqton görüşündən sonra Rusiya informasiya vasitələri əsəblərini cilovlaya bilmirdilər. Görünür, Putin qulağının dibində Trampın moderatorluğu ilə, Rusiyadan kənar nəqliyyat dəhlizinin açılmasına hər vəchlə mane olacağını nümayiş etdirir. Təbiidir ki, bunu zəif həlqə olan Ermənistan üzərindən həyata keçirməyə cəhd edir. Paşinyan əsl erməni kimi ona təzyiq edən hər tərəfə "hə" deyir. Amma bu, uzun müddət davam edə bilməz. ABŞ-də imzalanan və Trampın bilavasitə adı ilə bağlı olan layihə ermənilərin onu necə adlandırmasından asılı olmayaraq mütləq reallaşdırılacaq".
