İran Prezidenti Məsud Pezeşkiyan Tehranda yerləşən nüvə obyektini ziyarət edib. O, ABŞ-nin bombaladığı nüvə müəssisələrinin əvvəlkindən daha güclü şəkildə yenidən inşa olunacağını bildirib.
Sherg.az xəbər verir ki, ABŞ Prezidenti Donald Trampın Pentaqona 33 ildən sonra yenidən nüvə sınaqlarına başlama göstərişi verməsindən sonra artan nüvə gərginliyi fonunda İrandan yeni addım gəlib.
İran Prezidenti Məsud Pezeşkiyan Atom Enerjisi Təşkilatını ziyarət edib. O, alimlərlə birlikdə müəssisəni gəzib və görülən işlərlə bağlı məlumat alıb.
ABŞ-nin İsraillə müharibə zamanı İranın nüvə obyektlərinə zərbə endirməsinə toxunan Pezeşkiyan deyib:
“Bu obyektləri əvvəlkindən daha güclü şəkildə yenidən quracağıq. Binaları dağıtmaqla bizi geri sala bilməzsiniz. İranlı alimlər hələ də nüvə biliklərinə sahibdir.”
Prezident, Tehranın nüvə silahı əldə etmək niyyətində olmadığını bir daha vurğulayıb.
Səfərlə bağlı görüntülər Prezident Administrasiyasının rəsmi saytında yayımlanıb. Pezeşkiyanın ziyarəti, Oman Xarici İşlər naziri Bədr əl-Buseydinin ABŞ-la İran arasında danışıqlara yenidən başlanması çağırışından bir gün sonra baş tutub.
Oman, Tehranın və Vaşinqtonun iştirakı ilə beş tur danışıqlara ev sahibliyi edib. Altıncı tur gözlənildiyi bir vaxtda İsrail İranı vurmuşdu.
12 gün davam edən müharibənin sonunda ABŞ da İranın nüvə obyektlərinə hücum etmişdi. Donald Tramp “İranın nüvə proqramını məhv etdik” desə də, zərərin miqyasının nə qədər böyük olduğu hələlik məlum deyil.
Turan
