ABŞ Prezidenti Donald Tramp dövlət katibi Marko Rubio ilə Rusiya xarici işlər naziri Sergey Lavrov arasında telefon danışığından sonra Moskvadan məyus olub.
Bu barədə “Axios” mənbələrə istinadla məlumat yayıb.
Adını çəkilməsini istəməyən amerikalı rəsminin sözlərinə görə, Trampın Rusiyaya qarşı məyusluğu xarici siyasət qurumlarının rəhbərləri arasında keçirilən görüşdən sonra pik həddə çatıb.
“Telefon danışığı nəticəsiz başa çatıb və Vaşinqtonda belə nəticəyə gəlinib ki, ruslar müharibəni bitirmək üçün razılığa gəlmək istəmirlər, ona görə də Tramp-Putin görüşünün keçirilməsinin mənası yoxdur. Bu nəticə Trampın Rusiyaya qarşı yeni sanksiyalar tətbiq etmək qərarına zəmin yaradıb”, - mənbə vurğulayıb.
Politoloq Əhəd Məmmədli Sherg.az-a bildirib ki, Tramp avtoritar təfəkkürlü insandır:
"O deyir ki, Putini görüşə gətirirəm, bu görüşü Avropa İttifaqında (Aİ) təşkil edəcəyəm. Ağ Evin sahibi bunun üçün çalışdığını bildirir, amma sonra nə olur? O, açıqlama verir ki, Donbassın 78 faizi işğal edilib və Rusiya tərəfindən tutulub, hər kəs öz mövqeyində dayansın. Daha sonra Lavrov çıxış edir və “bu mümkündür” kimi bir açıqlama verir. Tramp isə görür ki, Avropa və daxildə demokratlar onun bu addımına müqavimət göstərirlər. Ona görə də əsəbləşir və deyir ki, bu görüşü təşkil etməyəcəyəm. Nəticədə ABŞ Prezidenti görüşdən imtina edir. Bu, Amerika-Rusiya münasibətlərinin yaxşılaşmayıb, əksinə, pisləşə biləcəyinin göstəricisidir. Rusiya isə öz işğal siyasətini davam etdirir. Onlar iddia edirlər ki, Ukraynanın yarısını ələ keçiriblər, amma Rusiyanın yayda başladığı hərbi əməliyyat uğursuz alınmışdı. ABŞ rəsmiləri də bunu açıq şəkildə bildirirlər. Tramp bu uğursuzluq fonunda daha sərt bəyanatlar verir, maksimum hədəflər irəli sürür. Bir növ qarşılıqlı gərginlik yaranır və hər iki tərəfdən addımlar atılır. Putin isə görünür Trampla münasibətləri pozmaq istəmir. O, ABŞ ilə müəyyən münasibətlərin qorunmasının Rusiyanın da mənafelərinə uyğun olduğunu bilir".
Analitikin fikrincə, hər iki tərəf uzun müddətli qarşıdurmanın ağır nəticələrini nəzərə almalıdır:
"Müqayisələr, tarixi misallarla bağlı arqumentlər nə qədər də israrla gətirilsə də, bu günkü reallıq başqadır. Vaşinqtonun hərbi büdcəsi Rusiyanın büdcəsindən xeyli böyükdür və uzunmüddətli münaqişənin davam etməsi hər iki tərəf üçün mürəkkəb nəticələrə gətirib çıxara bilər. Rusiya bu təzyiqə uzun müddət davam gətirə bilməyəcək".
