ABŞ-nin vasitəçilikdən kənarlaşması münaqişənin dayandırılmasında maraqlı olmamasını göstərmir
ABŞ artıq Rusiya və Ukrayna arasında danışıqlarda vasitəçi rolunu oynamayacaq.
Bunu Dövlət Departamentinin mətbuat xidmətinin rəhbəri Tammi Bryus deyib.
“Bu məsələyə yanaşma tərzimiz və metodologiyamız dəyişir. Biz vasitəçi olmayacağıq. İndi iş iki tərəf arasında aparılmalıdır. Bunun vaxtıdır”, - Bryus qeyd edib.
Politoloq Elşad Mirbəşiroğlu Sherg.az-a söyləyib ki, ABŞ indiyə qədər olan təmaslar zamanı Rusiya və Ukrayna arasında birbaşa danışıqlar imkanını mümkün edib:
"Donald Trampın xüsusi nümayəndəsi Stiv Uitkoff 4 dəfə Rusiya Federasiyasının Prezidenti Vladimir Putinlə görüş keçirib. Bu danışıqların hamısı konstruktiv kimi qiymətləndirilib. Digər tərəfdən Vaşinqtonun Ukrayna tərəfi ilə də təmasları baş tutub. Ağ Evin sahibi Volodimir Zelenski ilə sonuncu dəfə Vatikanda görüşdü. Həm Ukrayna, həm də Rusiyanın razılaşma üçün təklifləri mövcuddur. ABŞ-nin vitse-prezidenti Ceyms Devid Vens deyir ki, bu təklifləri uzlaşdırmaq vacibdir. Həmçinin Rusiya Prezidentinin mətbuat rəhbəri Dmitri Peskov bildirmişdi ki, Moskva heç bir ilkin şərt irəli sürmədən Ukrayna ilə birbaşa danışıqlara hazırdır. Görünür ki, Vaşinqtonun təsiri altında Kiyev də bütün bunlarla razılaşmalı olacaq. Ona görə də yaxın gələcəkdə Rusiya və Ukrayna tərəfinin birbaşa danışıqlarını müşahidə edəcəyik. Artıq ABŞ-nin vasitəçilikdən kənarda dayanması Vaşinqtonun münaqişənin dayandırılmasında maraqlı olmamasını göstərmir. Sadəcə ABŞ tərəflərin birbaşa təmaslarının reallaşması üçün ilkin şərtləri formalaşdırıb".
Politoloq qeyd edib ki, Tammi Bryusuj fikirləri o demək deyil ki, Vaşinqton Rusiya ilə ayrıca dialoqu dayandıracaq:
"Çünki ABŞ və Rusiya arasında təkcə müharibə yox, ikitərəfli əlaqələr və münasibətlər əsas müzakirə predmetini təşkil edir. Eyni zamanda ABŞ və Ukrayna mineral qazıntılarla bağlı razılaşma imzalayıb. Deməli Ağ Ev münaqişənin daha böyük həcmdə eskalasiyaya gətirib çıxaracağını düşünmür. Əks halda ABŞ belə bir razılaşmaya getməzdi. Ümumiyyətlə bundan sonrakı mərhələdə Vaşinqton Ukraynaya ciddi hərbi dəstək göstərməyəcək. O cümlədən ayrı-ayrılıqda tərəflərlə təmaslarının davam etdirəcək".
