RUSTAVİDƏ SAVALAN OSMANLININ KİTABININ TƏQDİMATI KEÇİRİLİB
Fevralın 9-da Rustavi Təhsil və Mədəniyyət Mərkəzində pedaqoq-yazar Savalan Osmanlınn Türkiyənin “Yenirəng Yayıncılıq” nəşriyyatında çapdan çıxmış “Həyatın anlamı və ruhun gizemi (sirri)” kitabının təqdimat mərasimi keçirilmişdir. Tədbiri giriş sözü ilə açan Mərkəzin rəhbəri Raidə Dərziyeva qonaqları salamladıqdan sonra müəllifi təbrik etmiş, ona yeni yaradıcılıq uğurları diləmişdir.
Raidə Dərziyeva öz çıxışında, həmçinin Savalan Osmanlının insani keyfiyyətlərindən bəhs etmiş, bu keyfiyyətlərin onun yaradıcılığına da yansıdığını xüsusi qeyd etmişdir.
Sonra tədbirin aparıcısı şair-rublisist Rafiq Hümmət Türkiyə türkcəsində nəfis tərtibatla çap olunmuş kitab barədə geniş məruzə etmiş, əxlaqi-didaktik, fəlsəfi fikirlərlə zəngin olan bu kitabın tezliklə Gürcüstanda Azərbaycan türkcəsində də nəşrinin vacibliyini vurğulamışdır. O, həmçinin kitabın çap olunmasında öz dəstəyini əsirgəməyən Türkiyənin “Yenirəng yayıncılıq” nəşriyyatının baş direktoruna və əməyi keçən əməkdaşlarına öz təşəkkürünü ifadə etmişdir.
Tədbir zamanı müxtəlif bölgələrdən gələn ziyalılar, söz adamları, müəllimlər bir-birindən maraqlı çıxışlar etmiş, müəllifə öz ürək sözlərini çatdırmışlar. Tanınmış şair Rövşən Nəsiboğlu, Qaratəhlə kənd ictimai məktəbinin direktoru Bəhram İsayev, həmin məktəbn dərs hissə müdiri Ramiz Mustafayev və müəllimi Yusif Hüseynov, “Təhsil” qəzetinin redaktoru Abay Paşayev, veteran müəllim Suddarxan Kazımov, Qardabani şəhər 3 saylı məktəbin Azərbaycan dili və ədəbiyyatı müəllimi, pedaqoq-yazar Sevda Şahverdiyeva, Rustavi şəhər 18 saylı məktəbin müəllimləri Nurlana Əliyeva və Alidə Kazımova, Mərkəzin müəllimi Tsira Londaridze, Qardabani Mədəniyyət evinin əməkdaşı Xalidə Qəribova, Haley Həsənov, Namiq Hüseynov, Kəmalə Kazımova və başqaları söz almış, həyatın müxtəlif məqamlarını xüsusi anlamla təsvir edən kitabın tərbiyəvi əhəmiyyətindən söz açmışlar.
