Parlamentində çoxluq Paşinyanı dəstəkləyir
Ermənistanın hakim "Vətəndaş Müqaviləsi" Partiyasının deputatları müxalifətin Baş nazir Nikol Paşinyana qarşı impiçment təşəbbüsünə qoşulmayacaq. Bunu Ermənistanın hakim partiyasından olan deputat Rüstəm Bakoyan jurnalistlərə deyib. Deputat bildirib ki, belə açıqlamalar verən jurnalistləri aldadıblar ki, guya "Vətəndaş Müqaviləsi"ndə impiçment prosesinə qoşulmağa hazır olan deputatlar var: "Belə bir şey yoxdur, hətta söhbət, müzakirə belə yoxdur.
Bu, gülünc mövzudur. Özüm və həmkarlarım adından zəmanət verirəm ki, hakim fraksiyada fərqli düşünən yoxdur. Hamımız eyni fikrə sadiqik, belə bir şey ola bilməz, komanda birlikdə hərəkət edir". Xatırladaq ki, impiçment təşəbbüsü parlamentdəki müxalif “Şərəfim var” fraksiyası tərəfindən irəli sürülüb. Təşəbbüsə digər müxalif qrup “Ermənistan” da qoşulub. “Şərəfim var” fraksiyasının rəhbəri Hayk Mamicanyan hakim partiyadan təşəbbüsə dəstək verənlərin olacağını istisna etməmişdi.
Politoloq İlqar Vəlizadə Sherg.az-a açıqlamasında bildirib ki, hər bir dövlətdə belə bir prosedur, yəni impiçment mövcuddur. Ekspert deyib ki, amma impiçmentin keçərli olması üçün parlamentdə təmsil olunan partiyaların əksəriyyəti bunu dəstəkləməlidir:
"Əks halda bu təşəbbüsün reallaşması qeyri-mümkündür. Xüsusən, nəzərə alaq ki, Ermənistan parlamentində çoxluq hakim "Vətəndaş Müqaviləsi" Partiyasındadır. Digər tərəfdən iddia olunur ki, iqtidar partiyasında da Paşinyandan narazı olanlar var və səsvermə zamanı onlar "hə" deyəcəklər. Ancaq bu, sadəcə ehtimaldır və çox güman ki, reallaşmayacaq. Bu cür ideyaların ortalığa atılması və ətrafında diskussiyaların aparılmasının məqsədi daxili siyasi meydanı qızışdırmaq, cəmiyyətdə anti-Paşinyan əhvali-ruhiyyəni gücləndirməkdir. Təbii ki, bunların hamısı da qarşıdan gələn parlament seçkisində müxalifətin özünə müsbət fon qazanmasına hesablanıb. Siyasi gedişat onu göstərir ki, yaxın aylar ərzində bu cür ritorika artacaq, qarşıdurma daha da kəskinləşəcək. Amma Paşinyan bunların hamısına tab gətirəcək. Sadəcə olaraq, Paşinyanın istəyi odur ki, müxalifət ümumiyyətlə parlamentə düşməsin, yaxud çox cüzi səslərlə düşsün".
