Lakin məsələ yalnız kadr çatışmazlığı ilə məhdudlaşmır – ümumilikdə ölkədə ciddi demoqrafik böhran yaşanır
Ermənistanda son illərdə kadr çatışmazlığı artan tendensiya ilə müşahidə olunur. Lakin bu problem yalnız kadr çatışmazlığı ilə məhdudlaşmır. Ölkədə ciddi demoqrafik böhran yaşanır. BMT-nin hesablamalarına əsasən, yaxın illərdə də əhali azalması davam edəcək. Bu tendensiya, təkcə sıravi vətəndaşların deyil, həm də dövlət strukturlarında çalışan peşəkar kadrların da ölkədən getdiyini göstərir.
Ermənistan baş naziri Nikol Paşinyan bu problemi etiraf etsə də, səbəblərini tam açıqlamır.
Mövzu ilə bağlı politoloq Elşad Mirbəşiroğlu Sherg.az-a açıqlamasında Ermənistanın demoqrafik böhran yaşamasından danışıb:
"Son illərdə Ermənistanda kadr çatışmazlığı artan tendensiya ilə müşahidə olunmaqdadır. Lakin məsələ yalnız kadr çatışmazlığı ilə məhdudlaşmır – ümumilikdə ölkədə ciddi demoqrafik böhran yaşanır. BMT-nin instansiyasının hesablamalarına əsasən, yaxın illərdə də Ermənistanda əhali azalması davam edəcək. Bu tendensiya ölkəni tərk edənlərin təkcə sıravi vətəndaşlardan ibarət olmadığını, həm də dövlət strukturlarında çalışacaq peşəkar kadrların da ölkədən getdiyini göstərir. Baş nazir Nikol Paşinyan bu problemi etiraf etsə də, onun əsas səbəblərini tam açıqlamır. Əslində, ölkədə kadr böhranı təkcə onun hakimiyyəti dövründə deyil, ondan əvvəlki dövrlərdə də mövcud idi. Bunun əsas səbəbi isə Ermənistanın illərlə apardığı işğalçı siyasət və təcavüzkar mövqedir. Bu siyasət nəticəsində Ermənistan iqtisadi və regional əməkdaşlıq imkanlarından kənarda qalmış, mühüm beynəlxalq və regional layihələrdən təcrid olunmuşdur. Halbuki, əgər İrəvan konstruktiv yanaşma sərgiləsəydi, bu layihələrdə iştirak edə bilərdi və ölkənin iqtisadiyyatı normallaşa bilərdi.
Ermənistan vətəndaşlarının, xüsusilə peşəkar kadrların ölkəni tərk etməsinin əsas səbəbi gələcəklə bağlı perspektivin olmamasıdır. Onlar Ermənistanın dövlət strukturlarında işləməkdə, ümumiyyətlə, ölkədə yaşamaqda perspektiv görmədikləri üçün xaricdə və ya qeyri-dövlət sektorunda iş axtarmağa məcbur qalırlar".
Ekpert Paşinyanın bu problemi dilə gətirməklə yanaşı, onun köklü səbəblərini də qəbul etməli olduğunu söyləyib:
"Bu, Paşinyanın və onun sələflərinin uzun illər yürütdüyü səhv siyasətin nəticəsidir. Çıxış yolu isə Azərbaycanın sülh gündəliyinə uyğun davranmaqdan, regional iqtisadi və nəqliyyat layihələrinə qoşulmaqdan keçir. Ermənistan nəqliyyat-kommunikasiya xətlərinin açılmasına və iqtisadi əməkdaşlığa razılıq versə, bu, ölkənin inkişafına töhfə verə bilər. Bunun üçün isə Ermənistan uzun illər dəstəklədiyi prinsiplərdən imtina etməli, qonşu dövlətlərə qarşı ərazi iddialarını bir dəfəlik geri çəkməlidir.
Hesab edirəm ki, Ermənistandakı iqtisadi və demoqrafik böhranın əsas kökündə məhz bu məqamlar dayanır".
Müsahibimiz sonda Paşinyanın həqiqətən bu problemi həll etmək istədiyi halda, əvvəlcə bu səhvlərin aradan qaldırılması istiqamətində real addımlar atmalı olduğunu bildirib.
