Ağ Ev Qəzza münaqişəsinin həlli üçün 20 bənddən ibarət sülh planını açıqlayıb.
Teleqraf xəbər verir ki, sənəd ABŞ administrasiyasının "X" sosial səhifəsində dərc olunub.
Sənəd anklav sakinlərinin məcburi köçürülməsini nəzərdə tutmur.
Sənəddə deyilir: "Heç kim Qəzzanı tərk etməyə məcbur edilməyəcək və getmək istəyənlər bunu etməkdə sərbəst olacaq. Biz insanları qalmağa təşviq edəcək və onlara Qəzzada daha yaxşı həyat qurmaq imkanı verəcəyik".
Bundan əlavə, ABŞ-ın planı anklavın İsrail tərəfindən işğalını və ya ilhaqını nəzərdə tutmur. Sənəddə qeyd olunur ki, nəzarət və sabitlik yarandıqdan sonra İsrail Müdafiə Qüvvələri müəyyən edilmiş müddətlərə uyğun olaraq qoşunlarını geri çəkməyə məcbur olacaq. Ağ Ev həmçinin Qəzza zolağında vəziyyəti sabitləşdirmək üçün müvəqqəti beynəlxalq qüvvələrin yaradılmasını təklif edir.
Nəşrin mənbəsinin sözlərinə görə, plan Qəzzaya ərəb və müsəlman dövlətlərinin şəxsi heyətindən ibarət hərbi kontingentin göndərilməsini nəzərdə tutur. Tramp hesab edir ki, bu, münaqişə bitdikdən sonra anklavda vəziyyətin sabitləşməsinə xidmət edəcək. Planın ayrıca bəndində bütün israilli girovların azad edilməsi tələb olunur.
