Fələstinin HƏMAS hərəkatı ABŞ Prezidenti Donald Trampın planına uyğun olaraq məhbusları azad etməyə razılaşıb.
Teleqraf xəbər verir ki, bu barədə "Əl-Cəzirə" məlumat yayıb.
“Bu kontekstdə hərəkat bu razılaşmanın təfərrüatını müzakirə etmək üçün vasitəçilərlə dərhal danışıqlara başlamağa hazır olduğunu təsdiqləyir”, - HƏMAS-ın bəyanatında deyilir.
Bundan əlavə, hərəkat Qəzza zolağının idarəçiliyini fələstinli texnokratlardan ibarət müstəqil hakimiyyətə təhvil verməyə razılaşıb.
HƏMAS vurğulayıb ki, ABŞ prezidentinin Qəzza zolağının gələcəyi və Fələstin xalqının qanuni hüquqları ilə bağlı təklifində qeyd olunan digər məsələlər vahid milli mövqe, müvafiq beynəlxalq qanun və qətnamələrlə bağlıdır.
Tramp "TruthSocial" sosial media platformasında HƏMAS-ı oktyabrın 5-i axşama qədər onun sülh planının şərtləri ilə razılaşmayacağı təqdirdə “görünməmiş cəhənnəm”lə hədələyib. Amerika lideri Yaxın Şərqdə sülhün bu və ya digər şəkildə əldə ediləcəyini vurğulayıb .
Ağ Ev rəhbəri deyib ki, onun “Yaxın Şərqin böyük, güclü və zəngin ölkələri, eləcə də ABŞ və İsrail ” tərəfindən razılaşdırılan sülh planı HƏMAS-a qalan döyüşçülərini xilas etmək üçün “son bir şans” verir.
Tramp bütün girovların dərhal azad edilməsini tələb edib və “bütün günahsız fələstinliləri mümkün hərbi əməliyyatlar zonasını dərhal tərk etməyə” çağırıb.
