“Əlavə xərcləri də sığorta paketinə daxil etməliyik"
Xəstələr hotel qiymətinə qalmağa məcburdur
Milli Məclisdə özəl xəstəxanalarda tibbi sığorta ilə bağlı problemlərdən danışılıb. Parlamentin Regional məsələlər komitəsinin sədri Siyavuş Novruzov deyib ki, tibbi sığortayla əlaqədar xidmətlər zərfində əməliyyat pulu qarşılansa da, qalmaq pulu nəzərdə tutulmur. Siyavuş Novruzov bildirib ki, bəzi əməliyyatlar özəl xəstəxanalara həvalə olunsa da, həmin özəl xəstəxanalarda qalmaq bahalı, hotel qiymətinədir:
“Xəstə əməliyyat olan kimi də durub evə gedə bilməz. Təklif edirəm ki, əməliyyat xərclərindən əlavə olan xərcləri də xidmətlər zərfinə daxil edək, ya başqa qayda ilə tənzimləyək. Digər tərəfdən, bir qrup xəstəliklər üçün dövlət tərəfindən dərmanlar ayrılır. Biz bir küçədən keçəndə az qala 10 aptek görürük. Amma bu xəstəliklər üçün ayrılan dərmanları ancaq bir aptekdən paylayırlar. Onun qarşısında sıra yaranır, vətəndaşa problem yaranır. 5-6 aptek açsınlar, onsuz da o dərmanların pulunu dövlət ödəyir. Vətəndaşı incitmək lazım deyil”.
Millət vəkili Razi Nurullayev də deyib ki, ildən-ilə sığorta paketinə daxil olan xəstəliklərin sayı artsa da, bununla bərabər bəzi xəstəliklərin də paketə daha tez daxil olunması vacibdir:
"Bu gün tibb müəssisələrində pasiyentlərə xidmət göstərən həkim kollektivindən başqa texniki və qeyri-tibb işçiləri də var. Tibb sahəsində, xəstəxana və tibb müəssisələrində çalışan qeyri-tibb, texniki, təsərrüfat sahələrində çalışan işçilərin əmək haqları çox aşağıdır. Xəstəxanalarda olan xidmət personalı ilə söhbət edirəm və görürəm ki, onlar səhərdən axşama kimi 400-500 manata çalışırlar. Bu şəxslərin sosial vəziyyətini yaxşılaşdırmaq üçün onların əmək haqları əsaslı şəkildə artırılmalıdır. Bu barədə həm Tibbi Sığorta Agentliyi, həm də TƏBİB ilə söhbətim olub. Yalnız 50 manat əmək haqqını artırmaq üçün xeyli vəsait tələb olunur. Buna görə də büdcə vəsaitlərinin müzakirəsi və qəbulu zamanı bu məsələnin prioritet kimi nəzərdən keçirilməsini istərdim".
