Samuxda oğlan 17 yaşlı qızı evlənmək məqsədilə qaçırıb.
Oxu.Az xəbər verir ki, bu barədə məlumat sosial şəbəkədə paylaşılıb.
İddia edilir ki, 10-cu sinif şagirdinin özündən böyük şəxslə ailə daxilində keçirilən mərasimlə dekabrın 28-də nişanı olub. Daha sonra oğlan qızı gəzmək adı ilə görüşə çağıraraq qaçırıb.
Məsələ ilə bağlı Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu ilə əlaqə saxladıq.
Oxu.Az-a açıqlama verən komitə rəsmisi faktı təsdiq edib:
“Belə bir hadisənin baş verdiyi barədə sosial şəbəkədə yayılan məlumatlar əsasında komitə tərəfindən araşdırma aparıldı və fakt təsdiqini tapdı.
İlkin məlumatlara görə, dekabrın 28-də Samux rayonu Qarayeri qəsəbə sakini 10-cu sinif şagirdi olan 17 yaşlı B.T ailələrin razılığı ilə nişanlanıb. Daha sonra nişanlandığı Samux rayonu Yenikənd sakini tərəfindən qaçırılıb. Hazırda şəxsin kimliyi müəyyənləşdirilir. Məsələ ilə bağlı aidiyyəti üzrə Samux Rayon İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyaya məlumat verilib. Hər iki tərəfin valideynləri məsələ ilə bağlı Samux Rayon İcra Hakimiyyətinə dəvət olunublar. Eyni zamanda hadisə barədə hüquq-mühafizə orqanlarına da məlumat verilib. Bütün zəruri tədbirlər görülür, məsələ komitənin nəzarətindədir”.