“Onu çoxdan çıxarmaq lazım idi”
“Məlum olduğu kimi, məşqçilər korpusu artıq tam heyətlə istefaya göndərilib”
“Yeni komanda formalaşdırılacaq”
Yaponiyanın paytaxtı Tokiodo keçirilən növbəti Olimpiya Oyunları Azərbaycan milli komandası üçün hələlik uğurlu deyil. Belə ki, ötən günlər ərzində cəmi üç idmançımız- cüdoçu İriniza Kindzerskaya, boksçu Alfonso Dominges və yunan- Roma güləşçisi Rafiq Hüseynov fəxri kürsüyə qalxmağı bacarıblar. Təmsilçilərimizin üçü də bürünc medal qazanıb. Qızıl və gümüşlərə isə hələlik həsrətik. Bu isə o deməkdir ki, dünyada idman vətəni kimi tanınan Azərbaycanın bu status kölgə altına düşə bilər. Hər halda SOS siqnalı çalmağın vaxtıdır.
Cüdo üzrə qadınlardan ibarət yığma komandamızın keçmiş baş məşqçisi, Əməkdar məşqçi İbadulla Şahbanov düçar olduğumuz uğursuzluq barədə “Sherg.az”a danışdı:
“Əlbəttə, cüdoçularımıza ümid bəsləyirdik. Əslində hazırlıqlarda problem yox idi. Təlim-məşq toplanışları vaxtlı-vaxtında təşkil edilirdi. Sadəcə məşqçi korpusu kifayət qədər təcrübəyə malik deyildi.Ukraynalı mütəxəssis Ruslan Maşurenko, ümumiyyətlə, məşqçi deyil. Onu çoxdan çıxarmaq lazım idi. Məlum olduğu kimi, məşqçilər korpusu artıq tam heyətlə istefaya göndərilib.
Yeni komanda formalaşdırılacaq. Bu da düzgün addım olmadı. Çünki əvvəlkilər heç olmasa, bir olimpiada görmüşdülər. Növbəti mötəbər yarışlar üçün praktika qazanmışdılar. Yenilər isə sıfırdan başlamalı olacaqlar”.
İ.Şahbanov, həmçinin məyusluğunu ifadə etdi:
“Əvvəllər yığma komandada cəmi dörd məşqçi var idi- Ağayar Axundzadə, Hacıağa Hacıəhmədov, Əli Dərvişov və mən. İndi isə ən azı iyirmi məşqçi cüdoçularla işləyir. Lakin bizim nəticələrimiz daha yaxşı olurdu. Nəzərinizə çatdırım ki, Tokioya yollanan idmançılarda ciddi çatışmazlıq yox idi. Amma bundan sonra toparlanmaq, komandanı bərpa etmək çətin olacaq”.
