Avropa İttifaqı Rusiyadan enerji asılılığını azaltmaq məqsədi ilə mayın əvvəlində Rusiya mənşəli qalıq yanacaqlardan mərhələli imtina ilə bağlı yol xəritəsi açıqlamağı planlaşdırır.
Teleqraf xəbər verir ki, bu barədə “Bloomberg” məsələ ilə bağlı məlumatlı şəxslərə istinadən məlumat yayıb.
Məlumata görə, yol xəritəsinin ayın birinci yarısında qəbul olunması gözlənilir. Aİ-nin planı Rusiyadan enerji idxalını azaltmaq yollarını araşdıracaq. Eyni zamanda, Avropa Komissiyasının kvotalar və ya tariflər kimi ticarətlə bağlı alətlərdən istifadəni tövsiyə etməyi nəzərdən keçirdiyi bildirilib.
Bildirilib ki, yol xəritəsindən sonra hüquqi təklif təqdim olunacaq.
Qeyd edək ki, nəzəri baxımdan Rusiyadan qaz idxalına sanksiya tətbiqi güclü hüquqi alət sayılsa da, Avropa İttifaqı bu günə qədər belə bir addımı təklif etməkdən çəkinib. Bunun səbəbi isə Macarıstan və Slovakiyanın etirazı səbəbindən bu tədbirin tələb olunan yekdilliklə dəstəklənməməsi ehtimalıdır.
2022-ci ildən etibarən əsas boru kəməri marşrutlarının əksəriyyəti bağlandıqdan sonra Rusiyadan boru kəmərləri vasitəsilə qaz təchizatı Avropanın yanacaq tələbatının 5%-dən azını təşkil etsə də, Rusiya Aİ-nin mayeləşdirilmiş təbii qaz üzrə ikinci ən böyük tədarükçüsü olaraq qalır. Keçən il idxal rekord həddə çatıb və əsas alıcılar arasında İspaniya, Fransa və Belçika yer alıb.
