“Xəstəliyini ilk dəfə öyrəndiyində həkim ona demişdi ki, 6 ay ömrün var”
Dillərdən düşməyən mahnıların müəllifi və ifaçısı Kayahanın vəfatından 8 il keçir. Kayahan Açar 1949-cu ildə İzmirdə dünyaya gəlib. Atası Süleyman Açar zabit olub və Firuzan xanımla evlənib. Bu evlilikdən oğulları dünyaya gəlib, adını Kayahan qoyublar. Kayahanın uşaq vaxtından musiqiyə həvəsi olub. İlk təhsilini Qarsda, Fevzi Çakmaq məktəbində alıb. Atası tez-tez fərqli bölgələrə göndərildiyindən Kayahan da ölkəni diyar-diyar gəzib. Gənclik illəri Ankarada keçib. 1973-cü ildə Nur adlı xanımla evlənib. Qız övladları dünyaya gəlib. Lakin 1991-ci ildə cütlük ayrılıb. Kayahan İstanbulda professional musiqi dərsləri alıb. Musiqi aləminə gəlişi 1971-ci ildə “Yosun gözlü sevgilim – Bir məktubun var” mahnı albomuyla başlayıb. 1978-ci ildə “Avroviziya” yarışmasına qatılan Türkiyə üçün mahnı bəstələyib. 1980-ci ildə 45 bəstədən ibarət “Gözlə, Gülüm – Atəş” adlı mahnı albomunu təqdim edib. Səsləndirdiyi bütün mahnıların müəllifi Kayahanın özüdür. Onun mahnılarını Sezen Aksu, Zərrin Özər, Bilgen Bengü, Nilufər kimi türk pop “ulduzlar”ı səsləndirib. Onun “Gecələr”, “Qan dənələri”, “Əsmər günlər” mahnıları türk pop musiqisinin şedevrləri hesab edilir.
Sənətçi “Gecələr” mahnısına görə 1986-cı ildə “Qızıl Portağal” mükafatına layiq görülüb. Sənətçi TRT Musiqi kanalında uşaqlar üçün “Şənbədən şənbəyə” adlı proqram hazırlayıb və aparıcı olub.
1991-ci ildə “Yemin ettim” albomunu təqdim edib. Kayahanın həyat yoldaşı İpək Açar sənətçinin xəstəliyini necə qarşılamasından danışıb: “Xəstəliyini ilk dəfə öyrəndiyində həkim ona demişdi ki, 6 ay ömrün var. Ağlına ilk gələn bu oldu ki, elə bir mahnı yazsın ki, öldükdən sonra da onu bu mahnıyla daim xatırlasınlar. “Yemin ettim” mahnısı belə bir mahnı oldu. Kayahan “mən bu mahnını can ağrısyla yazmışam”, deyirdi.
Amma Allah ömür verdi, ondan sonra da daha neçə-neçə gözəl əsərlər yazdı. 1992-ci ildə “Otaqlarda işıqsızam” mahnı albomu ərsəyə gəldi. Həmin il sənətçi 29 oktyabr Cümhuriyyət Bayramında Ankara Qızıl Ay Meydanında böyük konsert verib.
1996-cı ildə isə “Allah kimsəni sevgisiz qoymasın” şüarı ilə “Canımın yarpaqları” adlı albomu tərtib edib. Sənətçi daha iki dəfə də evlənib, qızı Əsli Könül 2000-ci ildə dünyaya gəlib. 2004-cü ildə yenə xərçəng xəstəliyinə tutulub, müalicə alıb, bir müddət yaxşılaşıb, 2014-cü ildə təkrar vəziyyəti ağırlaşıb, 2015-ci ili aprelin 3-də sənətçi vəfat edib. Sənətçinin inanclı biri olduğu da məlumdur. “Ölüm cəza deyil, məncə, məzuniyyətdir”, söyləyən Kayahan verdiyi müsahibələrin birində belə deyib: “Cənabi-Allahın qatına çıxacaqsınız, orada hesab verəcəksiniz. Buradakı dünyanın yalan olduğunu əgər düşünsəniz, hüzur özü gəlib sizi tapacaq”. Kayahan milyonlarla sevənin göz yaşları ilə Kanlıca Mehrimah Sultan məzarlığında dəfn edilib.
