İran nüvə silahı hazırlamaq yolunu tutmalıdır ki, Qərblə bərabər şərtlərlə danışıqlar apara bilsin. Bunu iranlı deputat Məhəmməd Qasım Osmani deyib.
Deputat bildirib ki, hərbi münaqişədən qaçmaq ağlabatan və məntiqlidir, lakin qlobal təkəbbür bizə başqa seçim qoymadı. Əgər zorakılıqla və həddindən artıq tələblərlə mübarizə aparmaq üçün başqa vasitəmiz yoxdursa, yeganə yol çəkindirici vasitə kimi nüvə silahının yaradılması istiqamətində sürətli addımdır.
Orta Doğu Araşdırmalar Mərkəzinin sədri, politoloq Sədrəddin Soltan “Sherg.az”a bildirib ki, İran aprelin doqquzunu milli nüvə texnologiyasına yiyələndiyi gün kimi qeyd edir:
“İran hakimiyyəti üçün nüvə texnologiyası təkcə elmin inkişafı, qeyri-hərbi sahədə tətbiqi sayılmır, eyni zamanda Qərbə, xüsusilə Amerika və İsrailə qarşı çəkindiricilik vasitəsidir. İrana qarşı təzyiqlər də məhz Tehran hakimiyyətinin atdığı addımlara əsaslanır. Atom Enerjisi üzrə Beynəlxalq Agentliyin (AEBA) baş direktoru Rafael Qrossinin yaxın vaxtlarda İrana səfəri gözlənilir. Sözügedən səfər zamanı beynəlxalq ictimaiyyəti, ABŞ və İsraili maraqlandıran məsələlərə aydınlıq gətirilə bilər. Ancaq Tehran hakimiyyəti bütün istiqamətlərdə nüvə proqramından imtina etmək niyyətində deyil. Çünki ABŞ və İsrailin İrana tələblərindən biri bütün istiqamətlərdə nüvə proqramından imtina etməsidir. Tehran isə bildirir ki, onlar Liviyanın etdiyi səhvi təkrarlamayacaqlar. Çünki 2003-cü ildə Liviya prezidenti Muəmmər Qəddafi nüvə proqramından imtina etmişdi və nəticə etibarıyla hakimiyyəti ilə bağlı müəyyən hadisələr baş vermişdi. Ona görə də İran hakimiyyəti qarşı tərəfə təzyiq vasitəsi kimi istifadə etmək üçün nüvə proqramından əl çəkmir. Qarşı tərəf isə İranı onların nüvə obyektlərini vurmaqla hədələyir. Fikrimcə, Qərblə İran arasında bu gərginlik uzun müddət davam etməyəcək. Tehran hakimiyyəti məsələ ilə bağlı Qərblə danışıqlara gedəcək. İranın xarici işlər naziri Abbas Araqçı bəyan edib ki, ABŞ ilə danışıqlara hazırdırlar və buna görə qarşı tərəf sanksiyaları yumşaltmalıdır. Digər tərəfdən isə İran Xarici İşlər Nazirliyinin sözçüsü İsmayıl Bəqai söyləyib ki, ehtimal olunan ABŞ İran danışıqlarında vasitəçiliyi Oman edəcək. Ona görə də danışıqlarla bağlı nikbin ehtimallar var. Əgər İran hakimiyyəti nüvə silahı hazırlayarsa, region üçün ciddi təhlükələr yaradar”.
