Laçında 150-yə yaxın erməni qalıb

  “Laçın şəhəri və Zabuxda qalan ermənilərə ərazini avqustun 25-nə qədər tərk etməsi tələbi qoyulub”. Bu sözləri siyasi şərhçi Asif Nərimanlı "Sherg.az"a deyib. Ekspert bildirib ki, buna etiraz edən ermənilər Laçın dəhlizinin kəndə keçən hissəsini bağlayıblar: “Onlar yaxşı bilir ki, çıxsalar, ya Rusiya sülhməramlılarının müvəqqəti yerləşdiyi Azərbaycan ərazisində, yaxud İrəvanın küçələrində evsiz qalacaqlar. Bu, Bakı üçün yeni imkan yaradır. Çünki ermənilərin Laçında qalmasının yeganə yolu Azərbaycan vətəndaşlığını qəbul etmələridir. Bakının onlara belə bir təklif verməsi ən azı Qarabağdakı “etnik ermənilərin” nəbzini yoxlamaq baxımından lazımdır. Laçında 150-yə yaxın erməni qalıb. İndiki vəziyyətdə onlardan heç olmasa biri Azərbaycan vətəndaşlığı haqda düşünə bilər. Buna nail olsaq, Xankəndinə bir addım da yaxınlaşa bilərik”.