"Növbəti ildən Cəbrayıl sakinlərinin doğma yurdlarına köçürülməsi işlərinə başlanılacaq. Hazırda Cəbrayıl şəhərində 712 mənzildən ibarət 33 bina tikilməkdədir və gələn il işlərin yekunlaşdırılması planlaşdırılır".
APA-nın Qarabağ bürosu xəbər verir ki, bunu bu gün Cəbrayıl rayonunun Soltanlı kəndinin təməlqoyma mərasimində jurnalistlərə açıqlamasında Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Prezidentinin xüsusi nümayəndəsi Vahid Hacıyev deyib. Bildirib ki, tikinti və təmir işləri tam yekunlaşdıqdan sonra Cəbrayıl sakinlərinin doğma yurdlarına köçürülməsinə başlanılacaq:
“Artıq Soltanlı kəndinin sakinləri ilə birgə bizim dost ölkəmizlə Macarıstan hökuməti ilə birgə təməlini qoyduq. Bilirsiniz ki, son 30 il ərzində bütün işğaldan azad edilmiş ərazilərin hamısı dağıdılmışdı. Təəssüflər olsun ki, Cəbrayıl rayonu da dağıntılara məruz qalıb. Artıq bizim macar dostlarımız da gördülər ki, Soltanlı kəndi nə vəziyyətə salınıb. Son 3 il ərzində müharibədən dərhal sonra cənab Prezidentin tapşırığı ilə Şərqi Zəngəzurda və Qarabağda bərpa-quruculuq işləri həyata keçirilməyə başladı. Cəbrayılda da kifayət qədər böyük quruculuq və bərpa işləri həyata keçirilir. Artıq bildiyiniz kimi, Horovlu və Şükürbəyli kəndləri tikilməkdədir. Cəbrayıl şəhərində 712 mənzildən ibarət 33 bina tikilməkdədir və inşallah, gələn il tikinti işləri yekunlaşacaq. Artıq Soltanlı kəndinin də tikintisini həyata keçirəcəyik. İnşallah, Soltanlı sakinləri də kəndə köçürüləcək və regionumuza, rayonumuza öz tövfələrini verəcəklər".
Vahid Hacıyev, həmçinin bildirib ki, bu gün təməli qoyulan Soltanlı kəndinin sakinlərinin işlə təmin olunması məsələsi də asanlıqla həyata keçiriləcək və bu istiqamətdə artıq bütün məsələlər öz həllini tapmaqdadır: “Soltanlı kəndi əsas strateji nöqtədə yerləşir. Bildiyiniz kimi, burdan əsas yollar - Horadiz-Cəbrayıl-Zəngilan avtomobil yolu, Horadiz-Ağbənd dəmir yolu keçir. Araz İqtisadi Zonasına daxil olan Araz vadisi burada yerləşir. Artıq Araz vadisinə böyük investorların investisiyaları qoyulmağa başlayıb. Əlbəttə ki, Araz vadisi Soltanlı kəndinin daxilindədir, burdan 5 kilometr məsafədədir. İnşallah, sakinlər həm də həmin iqtisadi zonada çalışacaq, regionumuzun inkişafına öz böyük tövfələrini verəcəklər”.
Qeyd edək ki, bu gün Cəbrayıl rayonunun Soltanlı kəndinin rəsmi təməlqoyma mərasimi keçirilib.
