"Putin və Tramp arasında aparılan danışıqlar və onların konteksti təsir dairələrinin yenidən bölüşdürülməsində mümkün yeni mərhələni göstərir. Lakin bu proses İkinci Dünya Müharibəsindən sonra Yalta bölgüsündən fərqlənir".
Bunu "Sherg.az"a açıqlamasında Bakı Politoloqlar Klubunun rəhbəri Zaur Məmmədov deyib.
Ekspert bildirib ki, bu gün mübarizə birbaşa deyil, əsas geosiyasi qovşaqlara, strateji resurslara və qlobal proseslərə nəzarət etmək üçündür:
"Rusiyanın məqsədi odur ki, ABŞ-nin dominant olmadığı çoxqütblü dünya yaradılsın. Postsovet məkanında, xüsusən də Ukrayna, Belarusiya, Qafqazda və Mərkəzi Asiyada təsirini gücləndirsin. Qərbin təsirini əsas bölgələrdən sıxışdırsın. Yaxın Şərq, Afrika və Latın Amerikasında NATO-nun zəifləməsinə və Qərbin parçalanmasına nail olsun. ABŞ isə çalışır ki, Çini əsas rəqib kimi zəiflətsin. Alyans sistemini yenidən formalaşdırsın.Yəni daha az hərbi öhdəlik və daha çox iqtisadi fayda olsun. Həmçinin, Moskvanın Çinlə əməkdaşlığını zəiflətmək üçün Rusiya ilə razılığa gəlməyə çalışır. Aİ-ni öz təhlükəsizliyini ödəməyə məcbur etməklə, Avropanın dünya siyasətindəki rolunu azaltmaq istəyir. Əslində, ABŞ və Rusiya mürəkkəb bir oyun oynayırlar. Onlar "dünyanı bölmək" deyil, mövcud nizamı öz xeyrinə yenidən formatlamağa çalışırlar".
Analitikə görə, hazırkı qarşıdurma bir neçə strateji əhəmiyyətli regionu əhatə edir:
"Rusiya Ukrayna üzərində öz nəzarətini qismən və ya tamamilə qurmaq istəyir. ABŞ Ukraynadan Rusiyanı cilovlamaq üçün bir vasitə kimi istifadə edir. Avropa NATO-nu vahid saxlamağa çalışır, lakin Trampın güc balansını dəyişəcəyindən qorxur. Kompromis mümkündür: - dondurulmuş münaqişə və ya Donbass üçün qismən muxtariyyət. Rusiya bəzi regionları ABŞ-nin təsiri altında qoyur, əvəzində dünyanın digər yerlərində fəaliyyət azadlığı əldə edir. Rusiya Çinlə ticarət etməklə tarazlıq qurur, lakin tam asılılıqdan qaçır. ABŞ Moskva və Pekin arasında müttəfiqliyi zəiflətmək üçün Rusiya ilə danışıqlara cəhd edə bilər. Rusiya və Çin Venesuela, Kuba, Nikaraquaya dəstək verir. ABŞ sanksiyaları və müxalifətə dəstəyi artıraraq bölgəyə nəzarəti bərpa etməyə çalışır. ABŞ və Rusiya təsir dairələri ilə bağlı qeyri-rəsmi saziş bağlaya, Ukrayna neytrallaşa və ya parçalana bilər. Yəni Rusiya təhlükəsizlik zəmanəti alır, lakin ABŞ-nin digər bölgələrdə təsirini tanıyır".
