Ermənistan Baş naziri Nikol Paşinyanın mayın 9-da İkinci Dünya müharibəsində qələbənin 80 illiyi ilə əlaqədar Moskvada keçiriləcək tədbirlərdə iştirakı naməlum olaraq qalır.
Bu barədə “Hraparak” qəzeti məlumat yayıb.
“Baş nazirin dəftərxanası Nikol Paşinyanın mayın 9-da Moskvada keçiriləcək paradda iştirak edib-etməyəcəyini açıqlamaqdan yayınır. Yalnız parlamentin sədri Alen Simonyan Paşinyanın iştirakının düzgün olacağı fikrini bildirib. Məlumata görə, ləngimə hakim “Vətəndaş Müqaviləsi” Partiyası daxilindəki fikir ayrılıqları ilə bağlıdır. Partiyanın “sorosçu qanad”ı Moskvaya getməyə qarşıdır. Məsələ həmçinin paradda iştirakın nəticəsiz qalmayacağını bəyan edən xarici tərəfdaşların (Avropa İttifaqının) təhdidləri ilə bağlıdır.
Hindistan, Macarıstan və Slovakiya baş nazirlərinin iştiraklarını ləğv etməsindən sonra Paşinyanın vəziyyəti daha da mürəkkəbləşib. Avropa İttifaqının xarici siyasət xidmətinin rəhbəri Kaya Kallasın təhdidləri əslində öz nəticəsini verib. Bununla belə, Paşinyan fors-major hal baş verməsə, getməyə meyllidir”, - erməni nəşri bildirir.
Rusiyanın Ermənistandan bir hərbi bölmənin parada göndərmək təklifinə gəlincə, “Hraparak” yazır ki, İrəvan Azərbaycandan fərqli olaraq Moskvaya hərbçilər göndərməyəcək.
Politoloq Asif Nərimanlı Sherg.az-a deyib ki, Nikol Paşinyan mövcud vəziyyətdə Moskvaya getməkdə maraqlıdır:
"Bunun əsas səbəbi Ukrayna cəbhəsində Rusiya və ABŞ danışıqlarının aparılmasıdır. İndiyə qədər müharibənin davam etməsi və Rusiyanın Qərblə daha açıq qarşıdurmada olması Ermənistan hakimiyyətinə imkan verirdi ki, antiRusiya siyasətini həyata keçirsin. Çünki Rusiya bütün diqqətinin Ukraynada olduğu bir vaxtda İrəvana qarşı sərt addımlardan yayınırdı. Moskva antiRusiya siyasətinin aparılmasında Paşinyanın əlinə əsas vermək istəmədiyi üçün Ermənistanla daha lokal münasibətlər qurmağa çalışırdı. Digər tərəfdən Ermənistan Rusiyanın sanksiyalardan yayınmasında əsas platforma rolunu oynayırdı. İki ölkə arasındakı ticarət dövriyyəsinin fantastik dərəcədə artmasının səbəblərindən biri bu idi. Lakin indiki halda artıq situasiya dəyişib. Vaşinqton və Moskvanın danışıqlar aparması o deməkdir ki, Rusiyaya qarşı qlobal müstəvidə təcrid olunma məsələsi tədricən aradan qalxır. Vasitəçi perspektivlər göstərir ki, ABŞ və Rusiya Ukrayna məsələsi daxil olmaqla, bir çox geosiyasi mövzuda anlaşa bilərlər. Eyni zamanda Rusiya yenidən postsovet məkanında, Cənubi Qafqazda, xüsusilə də Ermənistanda itirdiyi mövqelərini geri qaytarmaq istiqamətində daha aktiv fəaliyyət göstərəcək. Artıq məlumatlar var ki, Sergey Lavrov gələn ay Ermənistana səfər edəcək. Üstəlik, Ermənistan hakimiyyəti ABŞ-dən aldığı dəstəyini də itirəcək. Çünki Trampın komandası Bayden administrasiyası qədər İrəvana yardım etməyəcək. Bu mənada Ermənistanın Rusiyaya qarşı müqaviməti zəifləyəcək".
Analitik əlavə edib ki, Paşinyanın Moskvaya səfəri indiyə qədər Kremlə qarşı sərgilədiyi sərt mövqeyini yumşalda, konpensasiya edə bilər:
"Odur ki, Ermənistan Baş nazirinin böyük ehtimalla tədbirdə iştirakı reallaşacaq. Ümumiyyətlə mövcud şərtlər fonunda İrəvanın Moskva ilə münasibətlərinin kəskinləşməsi Ermənistanın əleyhinədir".
