ABŞ Səhiyyə və İnsan Xidmətləri Nazirliyi (HHS), Merilend ştatında yaşayan bir şəxsdə “ət yeyən parazit” (New World screwworm) aşkarlandığını açıqlayıb.
Sherg.az xəbər verir ki, məlumata görə, həmin xəstə qısa müddət əvvəl El Salvadordan ABŞ-yə qayıdıb.
HHS sözçüsü Endryu Nikson bunun ABŞ-də “epidemiya bölgəsindən qaynaqlanan ilk insan halı” olduğunu vurğulayaraq, “Bu hadisədən doğan ictimai sağlamlıq riski çox aşağıdır” deyib.
ABŞ Kənd Təsərrüfatı Nazirliyi (USDA) bildirib ki, bu qurdun sürfələri canlı toxumalara daxil olaraq sürətlə yayılır və çox vaxt ölümcül nəticələrə səbəb olur.
USDA açıqlamasında qeyd edilib: “Bu sürfələr heyvanların ətinə daxil olaraq ciddi zədələnmələrə yol açır və nadir hallarda insanlara da təsir göstərə bilər.”
Mütəxəssislər xəstəliyin “miyazis” adlanan və milçək sürfələrinin insan toxumasında inkişaf etməsi ilə ortaya çıxan bir infeksiya olduğunu bildirirlər.
“Ət yeyən parazit” əsasən Cənubi Amerika və Karib adalarında yayılıb.
Lakin son aylarda Meksikadakı mal-qara sürülərində və bəzi fermerlərdə aşkar edilən hallar ABŞ-də narahatlıq yaradıb. Bu səbəbdən ölkəyə girişlərdə yoxlamalar gücləndirilib.
Merilenddə aşkar edilən son hadisə isə 4 avqustda “telediaqnostika” adlı üsulla təsdiqlənib. Bu prosesdə xəstədən götürülmüş sürfə görüntüləri mütəxəssislər tərəfindən araşdırılıb. Lakin xəstənin sağlamlıq durumu ilə bağlı hələlik rəsmi açıqlama verilməyib.
