Qış mövsümü və havaların qeyri-stabil keçməsi ilə əlaqədar bütün respirator xəstəliklər, həmçinin mövsümi qrip hallarının artması daha çox müşahidə edilir.
Bu barədə Səhiyyə Nazirliyinin bayram günləri ilə əlaqədar əhaliyə müraciətində deyilir.
"Hər hansı səbəbdən profilaktik peyvəndlərdən kənarda qalan uşaqlar və yanaşı xəstəlikləri olan risk qrupuna aid şəxslər mövsümi respirator xəstəliklərə görə yüksək həssaslığa malik əhali qrupları hesab olunur.
Əhalinin sağlamlığının qorunması və yoluxma hallarının qarşısının alınması məqsədilə Azərbaycan Respublikasının Səhiyyə Nazirliyi qarşıdan gələn bayram və istirahət günlərində, xüsusilə yüksək həssaslığa malik şəxslərə kütləvi tədbirlərdə və insanların sıx toplaşdığı məkanlarda tənəffüs yollarını qoruyan fərdi vasitələrdən istifadə, həmçinin əl gigiyenasına riayət etməyi tövsiyə edir. Eyni zamanda, gündəlik qidalanma rejiminə bol vitaminli ərzaqların daxil edilməsi məqsədəuyğundur.
Hər bir vətəndaş sağlamlığına xüsusi diqqət və məsuliyyətlə yanaşmalı, özünü və ətrafındakıları infeksiyalara yoluxmadan qorumalıdır", - müraciətdə vurğulanıb.
Professor Adil Qeybulla “Sherg.az”a açıqlamasında deyib ki, bu gün Covid -19 pandemiyası bitsə də, xırda epidemiyalar davam edir:
“Yəni Omikron ştamının mutasiya variantları və onun müxtəlif təzahürü, müxtəlif təmaslı növləri mövcuddur. Bundan başqa, əhali arasında retroviruslar, rinoviruslar, entera viruslar, adi qrip virusu tüğyan etməkdədir və çoxsaylı xəstələnmələr var. Birinci növbədə insanlar geyim seçiminə diqqət etməli, havanı nəzərə almalı, diqqətli olmalıdırlar. Meyvə və tərəvəzlərdən ibarət balanslı pəhriz tətbiq edin. C vitamini ilə zəngin qidalar (portağal, limon, kivi və s.) istehlak edin. Kifayət qədər su için və isti içkilərə üstünlük verin. Çünki hər bir xəstəlik orqanizmdə öz izini qoyub gedir. Orqanizmlə necə davrandığımızı bilmədiyimiz üçün son nəticədə xəstəliklə üz-üzə gəlirik. Bu gün coviddən sonra autumun xəstəliklərin, xərçəngin artması da təsadüfi deyil. Ona görə də diqqətli olmaq lazımdır”.
