“Hazırda Yeni Azərbaycan Partiyasının (YAP) üzvlərinin siyahısının dəqiqləşdirilməsi prosesi gedir. Artıq bu sahədə bir sıra işlər görülüb”.
Oxu.Az-ın məlumatına əsasən, bunu YAP sədrinin müavini - Mərkəzi Aparatın rəhbəri Tahir Budaqov jurnalistlərə açıqlamasında deyib.
O bildirib ki, YAP-a üzvlüklə bağlı yeni elektron sistem bazası qurulur:
“Müxtəlif dövlət qurumları ilə birgə işlər görülür. “ASAN xidmət” vasitəsilə bütün partiya üzvlərinin məlumatlarının dəqiqləşdirilməsi, onların uçotunun aparılması, həm qeydiyyat yeri, həm də onların miqrasiya prosesləri ilə əlaqədar işlər aparılır”.
T.Budaqov vurğulayıb ki, YAP-a daimi yeni üzvlər qəbul olunur:
“Təbii ki, gənclərin müraciəti çoxluq təşkil edir. Partiyanın üzvlüyündən çıxarılanlar var, lakin bu çox məhdud saydadır. Vəfat edənlər də olur. Müxtəlif səbəblərdən partiya uçotunda müvafiq dəqiqləşdirilmələr aparılır. Son statistikaya əsasən, YAP-ın 800 minə yaxın üzvü var”.