Azərbaycanda uzunmüddətli bayram istirahətləri, xüsusilə Novruz və Ramazan bayramları, turizm sektoruna mühüm təsir göstərir. İnsanlar bu fürsətdən istifadə edərək hotellərə, restoranlara və müxtəlif turizm obyektlərinə üz tuturlar. Uzunmüddətli istirahət günləri daxili turizmin canlanması üçün əhəmiyyətli rol oynayır.
Bəs, bu il bayram günləri turizm sektoruna necə təsir etdi?
Turizm məsələləri üzrə ekspert Əziz Şiriyev "Sherg.az"-a bildirib ki, Novruz və Ramazan bayramı ilə əlaqədar insanlar regionlara da bir və ya, 2-3 günlük səfərlər etdilər:
“Həmçinin xaricə də səfərlər oldu. Amma keçən illərə nisbətən bir az azalma müşahidə olunur. Çünki Ramazan ayı turizmə kifayət qədər təsir etdi. Lakin düşünürəm ki, gələn il Ramazan bayramı və Novruz bayramı üst üstə düşəcək və həmin günlərdə insanlar daha çox istirahət və səyahət edəcəklər. Bu gün Azərbaycan hava yolu bir sıra ölkələrə birbaşa uçuşlar həyata keçirdiyinə görə çox münasib qiymətlərlə tur paketləri etmək olur. Hətta qrup turları da var. Turizm şirkətləri tərəfindən satışda çox münasib qiymətədir və azərbaycandilli bələdçi ilə bir yerdədir. Əksər insanlar qruplara qoşuldu, əksəriyyəti isə regionlara getdi. Bu səfərlər həm cənub istiqamətində, həm şimal, həm də qərb istiqamətində baş tutdu. Hətta bəzi rayonlara 50 nəfərlik qruplarla turlar həyata keçdi. Otellərdə də demək olar, boş otaqlar qalmamışdı”.
