YUNESKO-nun baş direktoru Azərbaycana qarşı həmişə qərəzli mövqe sərgiləyib
"YUNESKO-nun baş direktoru Odre Azule Fransız əsillidir. O, Fransa "Dauphine" universitetində, həmçinin Parisin siyasi tədqiqatlar İnstitutunda təhsil alıb". Bu barədə Mətbuat Şurasının İdarə Heyətinin üzvü Müşfiq Ələsgərli deyib. O bildirib ki, Odre Azule 2014-cü ildə Fransa prezidenti Fransua Ollandın mədəniyyət və kommunikasiyalar üzrə müşaviri olub.
Daha sonra ölkənin Mədəniyyət və kütləvi kommunikasiyalar naziri vəzifəsini tutub: "Odre Azule Fransanın mövcud siyasi kursunu tam mənimsəyib, onun icraçılarından biridir. 2017-ci ildə YUNESKO-nun baş direktoru postuna gətirilən Azule bu vəzifədə çalışdığı dövrdə Azərbaycana qarşı ziddiyyətli mövqe sərgiləyib. Tutduğu beynəlxalq statuslu vəzifədən istifadə edərək, Fransanın Azərbaycana qarşı həyata keçirdiyi qarayaxma kampaniyasına töhfə verib. Azərbaycan 44 günlük müharibədə qələbə qazanan kimi, guya bəzi dini-mədəni abidələrin dağılması barədə Ermənistanın iddialarını əsas alaraq, bölgəyə missiya göndərilməsi istiqamətində canfəşanlıq edib. Ölkəmizin mədəni sərvətlərinin Ermənistan tərəfindən dağıdılması və mənimsənilməsi barədə YUNESKO-ya yetərli məlumatlar verilməsinə baxmayaraq, qurum Azərbaycanın mədəni irsinə dəyən ziyanın qiymətləndirilməsi məqsədilə işğal olunmuş ərazilərə missiya göndərməyib. Azərbaycanın Birinci vitse-prezidenti Mehriban xanım Əliyevanın YUNESKO-nun xoşməramlı səfir vəzifəsindən imtinasını YUNESKO-nun bu siyasətinə etiraz kimi də dəyərləndirmək olar".
Məlumat üçün bildirək ki, ölkənin Birinci vitse-prezidenti Mehriban xanım Əliyeva xoşməramlı səfir kimi fəaliyyətinə xitam verilməsi məqsədilə təşkilatın baş direktoru Odre Azuleyə məktub ünvanlayıb.
