Türkiyə Prezidenti Rəcəb Tayyib Ərdoğan Birləşmiş Ərəb Əmirliklərinin Prezidenti Məhəmməd bin Zayed Əl-Nəhyanla telefon danışığı aparıb. Bu barədə Türkiyə Respublikası Prezident Administrasiyasının İctimaiyyətlə Əlaqələr İdarəsindən məlumat verilib.
R.T.Ərdoğan telefon danışığı zamanı Birləşmiş Ərəb Əmirliklərinin Əbu-Dabi şəhərində keçirilən Azərbaycan-Ermənistan sülh danışıqlarını Türkiyənin diqqətlə izlədiyini və Cənubi Qafqazda sabitliyin təmin olunmasına yönəlmiş səyləri dəstəkləməyə davam edəcəklərini qeyd edib.
Mövzu ilə bağlı politoloq Yusif Bağırzadə Sherg.az-a açıqlama verib:
"Türkiyə Ermənistanla Azərbaycan arasında sülh sazişinin tez bir zamanda baş tutmasında maraqlıdır. Çünki Ankara çox gözəl başa düşür ki, regionda öz maraqlarını ifadə etmək istəyən başqa güc sahibi olan dövlətlər var. Məsələn İran və yaxud Rusiya Ermənistanla Azərbaycan arasında sülh müqaviləsinin bağlanmasında maraqlı deyillər. Türkiyə Azərbaycanın strateji müttəfiqidir, digər tərəfdən Ermənistan Türkiyənin qonşudur. Bu gün də hələ Azərbaycanla Ermənistan arasında sülh müqaviləsi bağlanmadığına görə Türkiyə ilə Ermənistan arasındakı sərhəd məntəqəsi bağlıdır və iki dövlət arasında rəsmi-diplomatik korpus mövcud deyil. Ona görə də Ermənistanın baş nazirinin Türkiyəyə rəsmi səfəri və həmin səfər çərçivəsində Ərdoğanla görüşü, eləcə də görüş zamanı Azərbaycanla Ermənistan arasında sülh müqaviləsinin tənzimlənməsi barədə fikir mübadiləsi aparılması diqqət çəkir. Digər tərəfdən, Ərdoğanın İlham Əliyevlə Nikol Paşinyanın Əbu-Dabidə keçirilən görüşündən sonra Əbu-Dabiyə etdiyi telefon zəngi tamamilə başa düşüləndir".
Ekspert Türkiyənin Cənubi Qafqazda sülhün bərqərar olmasında, kommunikasiya xətlərinin açılmasında maraqlı olduğunu bildirib:
"Ankara Ermənistanla diplomatik münasibətlər bərpa olunmasını və Zəngəzur dəhlizinin açılmasını istəyir. Böyük ehtimalla Zəngəzur dəhlizi ABŞ-yə aid özəl şirkətə veriləcək. Ancaq həmin yolun təhlükəsizliyi yəqin ki, NATO İttifaqına daxil olan bir dövlət olaraq Türkiyəyə həvalə olunacaq.
2026-cı ildə Ermənistanda parlament seçkiləridir. Yəqin ki, üçüncü dövlətlər çalışacaqlar ki, Ermənistanda qeyri-stabillik yaransın. Bu səbəbə görə də Türkiyə müqavilənin bağlanmasına maraq göstərir. Bundan başqa qeyd etmək lazımdır ki, bu günkü gündə Ermənistanda Rusiyanın hərbi bazası yerləşir. Əvvəllər bu hərbi baza Türkiyəyə qarşı olan bir hərbi baza kimi mövcud idi".
Politoloq sonda Azərbaycanla Ermənistan arasında sülh müqaviləsi bağlandıqdan və Türkiyə ilə Ermənistan arasında olan diplomatik münasibətlərə yol açılandan sonra Ermənistanın həmin rus bazasını öz ərazisindən çıxarmasına nail olacağı ehtimalını da söyləyib.
