Aprelin 26-da Azərbaycan Respublikasının Prezidenti İlham Əliyevin Almaniya Federativ Respublikasının Prezidenti Frank-Valter Ştaynmayer ilə geniş tərkibdə görüşü keçirilib. Görüşdə “Petersberq İqlim Dialoqu”nun əhəmiyyəti və Prezident İlham Əliyevin bu tədbirdə çıxışı qeyd olunub. Dövlətimizin başçısı tədbirə dəvətə görə təşəkkürünü bildirib.
Söhbət zamanı COP29-la əlaqədar Almaniya ilə Azərbaycan arasında uğurlu əməkdaşlıq və heyətlər arasında görüşlərin önəmi xüsusi vurğulanıb. COP29-la bağlı yaradılan “üçlük” mexanizminin əhəmiyyətinə toxunuldu, Almaniyanın COP29-la əlaqədar Azərbaycana bundan sonra da dəstək göstərəcəyi diqqətə çatdırılıb. Söhbət zamanı sərhədlərin delimitasiyası və demarkasiyası istiqamətində iki ölkə arasında birbaşa danışıqlarda əldə edilmiş nəticələr qeyd olunub. Həmçinin qarşılıqlı maraq doğuran digər məsələlər barədə də fikir mübadiləsi aparılıb.
Politoloq Tural İrfan "Sherg.az"a deyib ki, Almaniya ilə Azərbaycan arasında müstəqillik illərindən bəri əlaqələr mövcud olub, indi isə münasibətlər inkişaf mərhələsinə qədəm qoyub:
"Doğrudur, Ermənistan - Azərbaycan arasındakı keçmiş münaqişə ərəfəsində problemin həlli yolunda Almaniyanın nəzərəçarpacaq dərəcədə rolu olmasa da, Fransa kimi problemi dərinləşdirmək cəhdləri də olmayıb. Hazırda isə Azərbaycanın qələbəsindən sonra regionda və dünyada artan siyasi nüfuzu Almaniyanı da məcbur edir ki, rəsmi Bakı ilə əlaqələri yenidən sıxlaşdırsın. Hazırda Almaniya prezidenti Frank - Valter Ştaynmayer Azərbaycandadır və Azərbaycan Respublikasının prezidenti cənab İlham Əliyev ilə müzakirələr keçirilir. Əsasən Ermənistanla Azərbaycan arasındakı sülh prosesindən danışılacağı, bu sülhün regiona və digər ölkələrə yönəlik əhəmiyyətindən danışılacağı gözlənilir. Hər bir halda iki ölkə arasında yeniləşən siyasi proseslər davam etməli və inkişaf mərhələsinə qədəm qoymalıdır".
Politoloq əlavə edib ki, Almaniya və Azərbaycan arasında mümkün olan sahələrdə bütün əlaqələrin davam etməsi, hətta inkişaf etməsi mümkündür".
"Ümid edirəm ki, bu əlaqələrin səmərəli istirahətdəki inkişafı da bu müzakirələrdə mövzu olacaqdır. Əsasən Ermənistan - Azərbaycan arasındakı normallaşmağa doğru gedən proseslər və sülh müqaviləsinə doğru atılan addımların gedişatı və nəticələri, baş tutduğu təqdirdə verəcəyi töhfələr barədə dialoqun da olması labüd görünür".
