“Gossip Girl” serialında Georgina obrazını canlandıran Mişel Traxtenberq 39 yaşında dünyasını dəyişib. Məşhur aktrisanın ölüm səbəbi məlum olub.
Sherg.az xəbər verir ki, Traxtenberqin Nyu-Yorkdakı evində “şüursuz və reaksiyasız” vəziyyətdə tapıldığı açıqlanmışdı.
“The Guardian” nəşrinin məlumatına görə, Mişel Traxtenberqin diyabetlə bağlı yaranan fəsadlar səbəbilə vəfat etdiyi bildirilib.
Aktrisanın səhhətində uzun müddətdir problemlər olduğu və ölümünün “təbii səbəblərlə” əlaqəli olduğu vurğulanıb.
Aktrisanın ailəsi otopsi aparılmasını rədd edib. Nyu-York tibbi ekspertizası isə Traxtenberqin ölümündə şübhəli bir hal olmadığı üçün otopsiyaya ehtiyac duyulmadığını açıqlayıb.
11 oktyabr 1985-ci ildə Nyu-Yorkda doğulan Mişel Traxtenberq uşaqlıq illərində aktyorluğa başlayıb. O, hələ 9 yaşında olarkən “The Adventures of Pete and Pete” serialında rol alıb.
İlk kino təcrübəsini isə 1996-cı ildə çəkilən “Harriet the Spy” filmində baş rol ifaçısı olaraq yaşayıb.
Aktrisa “Buffy the Vampire Slayer” serialında Buffy'nin bacısı Dawn Summers obrazını canlandırdıqdan sonra “Gossip Girl” serialındakı Georgina Sparks rolu ilə dünya miqyasında tanınıb.
