İsrail Hərbi Hava Qüvvələrinə məxsus qırıcı təyyarələr Livanın cənubunda şiə Hizbullah təşkilatının hərbi obyektlərinə azı üç zərbə endirib.
Teleqraf "Al Hadath TV"yə istinadən xəbər verir ki, təyyarələr Səhl əl-Cermuk düzündə və Vadi əl-Əxdar dərəsində şiə yaraqlılarının bazalarına raket zərbələri endirib. Hadisə şahidləri ərazidə güclü partlayış səslərinin eşidildiyini bildiriblər. Hazırda hava hücumlarına məruz qalan ərazilərdən qalın tüstü yüksəlir. Ölən və yaralananlar barədə məlumat verilmir.
Telekanalın məlumatına görə, İsrail təyyarələri Livanın hava məkanında qalır, Bekaa vadisi və Suriya ilə həmsərhəd dağlıq ərazi üzərində alçaq hündürlükdə uçur.
Sentyabrın 26-da İsrail təyyarələri Hizbullahın Baalbek bölgəsində dəqiq raketlərin istehsal olunduğu və saxlanıldığı yeraltı obyektini məhv edib.
Sentyabrın 21-də İsrailin pilotsuz təyyarəsinin Livanın cənubundakı Bint Cbeil şəhərinə endirdiyi zərbə nəticəsində üçü uşaq olmaqla beş nəfər həlak olub.
