“Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”na magistratura səviyyəsi üzrə qəbul nəticələri müəyyən olunub.
Bu barədə Elm və Təhsil nazirliyi məlumat yayıb.
Bildirilib ki, müsabiqənin nəticələrinə əsasən 356 namizəd magistratura səviyyəsi üzrə proqram iştirakçısı adını qazanıb.
Beləliklə, 2025-2026-cı tədris ili üzrə Dövlət Proqramı çərçivəsində 125 nəfər bakalavriat, 356 nəfər magistratura və 19 nəfər isə doktorantura səviyyəsində olmaqla, ümumilikdə 500 nəfər təhsil almaq hüququ qazanıb.
Dövlət Proqramı çərçivəsində proqram iştirakçısı seçilən 500 nəfərdən 160 nəfəri “universitetlər üzrə top 10”da yer alan ali təhsil müəssisələrində təhsil alacaqlar. Bu siyahıda "Stanford University", "Massachusetts Institute of Technology", "National University of Singapore", "University of Oxford", "University of California, "Berkeley", "ETH Zurich", "University of Oxford", "Harvard University", "Yale University" kimi nüfuzlu ali təhsil müəssisələri yer alır.
Qeyd edilib ki, Dövlət Proqramı çərçivəsində magistratura səviyyəsində həyata keçirilmiş müsahibə mərhələsindən müsbət nəticə əldə etmiş, lakin müsabiqə mərhələsindən keçməyən namizədlərə aid ehtiyat siyahısı da vardır ki, 2025-2026-cı tədris ili üzrə proqram iştirakçısı seçilmiş namizədlərdən kimsə proqramdan bu və ya digər səbəbdən imtina etdiyi təqdirdə Seçim Qaydalarının 4.20-ci bəndi rəhbər tutularaq sözügedən siyahıya istinad olunaraq növbəti Dövlət Proqramı iştirakçısının seçilməsi nəzərdə tutulur.
Təhsil eksperti Elçin Əfəndi “Sherg.az”a bildirdi ki, 2022-2028-ci il dövlət proqramında artıq nəzərdə tutulurdu ki, xarici ölkələrin ali təhsil müəssisələrində dövlət proqramına qəbul olan şəxslər ölkəyə qayıtdıqdan sonra əmək fəaliyyətinə başlasınlar:
“Yəni onların demək olar ki, beş illik bir əmək müqaviləsi bağlanır və ölkəyə qayıtdıqdan sonra minimum beş il ölkədə fəaliyyət göstərməlidirlər. Əlbəttə ki, burada daha çox magistratura proqramına cəlb olunma, sonra bakalavr, sonra isə doktorantura yer tutur. Hazırkı tədris ilində təhsil alanların say nisbətinə görə 500 nəfərlik kvota kadr ehtiyatlarına cavab vermir. Biz təkcə 500 nəfərlə kifayətlənməliyik. Ölkəmizdə fəaliyyət göstərən ali təhsil müəssisələrini bitirən şəxslər də var. Onlar da təbii ki, dövlət qulluğunda, dövlətə məxsus qurumlarda və digərlərində işləmək imkanı qazanmalıdır.”.
