Küçə və parkların, binaların girişlərinin, həyətlərin dezinfeksiya edilməsi koronavirusla mübarizə tədbirlərinin əsas hissəsidir. Paytaxtın bir çox ərazilərində bu işlərin aparıldığını müşahidə edirik. Lakin yaddan çıxmış, gözdən iraq qalan ərazilər də var.
Məsələn, Suraxanı rayonu, Qaraçuxur qəsəbəsi. Bu ərazinin, xüsusən də Qaraçuxur qəsəbəsi, İlqar Musayev küçəsinin sakinləri indiyədək bircə dəfə də olsun yerli icra orqanlarının ərazidə dezinfeksiya işləri apardığını görməyib. Halbuki ətraf zibillik və natəmizlikdir. Amma əraziyə nə gələn var, nə də maraqlanan. Bəlkə düşünürlər ki, sənədsiz evlərdir, ora getmək lazım deyil? Amma yerli bələdiyyə mart ayının əvvəli sakinlərdən əmlak və torpaq vergisi toplamışdı. Topladıqları vəsaitdən heç olmasa dezinfeksiya işlərinə də sərf etsinlər. Belə ağır durumda.
Ümumiyyətlə, bələdiyyələr dezinfeksiya işlərinə nə dərəcədə cəlb olunub və ya olunmalıdır? Sualımızı Bələdiyyələrin Fəaliyyətinin Təbliği Birliyinin sədri Vüqar Tofiqliyə ünvanladıq. V.Tofiqli bu işlərə bələdiyyələrin də dəstək göstərməli olduğunu dedi:
- Əvvəlcə deyim ki, pandemiya ilə baglı bütün işlər konkret Dövlət Proqramı üzrə aparılır. Nazirlər Kanineti yanında Operativ Qərargah cox ciddi qərarlar qəbul etməkdədir. O cümlədən də dezinfeksiya işləriylə bağlı. Lakin bir cox yerlərdə inzibati ərazi vahidlərində bu işə həm də bələdiyyələr maliyyə imkanları çərçivəsində dəstək dururlar. Ancaq bu işlərin icrası və ona nəzarət bələdiyyələrə yox, bilavasitə yerli icra orqanlarının üzərinə düşür. Fikrimcə, hər kəs indiki həsas və məsuliyyətli məqamda öz üzərinə düşən vəzifəni layiqincə yerinə yetirməlidir. Düşünməlidir ki, bu virus hər an onun da evinin kəndarında dayanıb onu yoluxudura bilər. Hər halda diqqətli, məsuliyyətli olmalıyıq.
Məlahət
