Aprelin 28-i saat 00:25-də Ermənistan silahlı qüvvələrinin bölmələri Çəmbərək rayonu istiqamətində yerləşən mövqelərindən Azərbaycan Ordusunun mövqelərini atıcı silahlardan atəşə tutub.
Bu barədə Müdafiə Nazirliyi məlumat yayıb.
"Bölmələrimiz tərəfindən qeyd olunan istiqamətdə adekvat cavab tədbirləri görülüb", məlumatda deyilir.
Politoloq Tural İrfan Sherg.az-a bildirib ki, Ermənistan ilə münasibətlərin nizama salınması üçün kifayət qədər işlər görülür və sülh prosesinə gedən yolda işlər yekunlaşmaq üzrədir:
"Ermənistan tərəfi boynuna düşən öhdəlikləri icra etməlidir. ATƏT-in Minsk qrupunun ləğvi və konstitusiya dəyişikliyi reallaşmalıdır. Ermənistan silahlanmanı davam etdirsə də sülhlə bağlı bəyanatları ümidvericidir. Məlumdur ki, uzun illərdir Ermənistanda ridikal qüvvələr təşəkkül tapıb, xarici dövlətərin təsirində olan, əsasən də Rusiya yönlü qüvvələr mövcud olub. Hazırda bu qüvvələr müxalifətdə olsa da hökumətin içində də var. Eyni zamanda hökumətin özü də bəzən ikili standartlara meylli və ayağı sürüşkən siyasət aparır. Atəşkəsin pozulmasında revanşist qüvvələrin təsiri böyükdür. Hakimiyyətin daxilində bəzi qüvvələrin də müəyyən maraqları ola bilər. Erməni xislətinə xas davranışlar sözsüz ki, danışıqlara da öz təsirini göstərir".
Politoloq əlavə edib ki, əgər Ermənistan hakimiyyəti bu cür davranışları adət halına gətirməkdən əl çəkməsə, hər dəfə fərqli bəhanələrlə davam etsə, Azərbaycan tərəfin müvafiq addım atması labüddür:
"Ancaq hesab edirəm ki, Ermənistan tərəfində müəyyən revanşist qüvvələr bu təxribatçı əməllərlə Paşinyan hakimiyyətinin sülhə doğru addımlarına zərbə vurmaq məqsədi ilə rəvac verə bilər. Ermənistan sülhə əməli şəkildə hazır olduğunu sübut etməlidir. Atəşkəsin pozulması etimadsızlıq yaradır".
