“Madrid planı” Azərbaycan üçün faydalı deyildi
“Ermənistanın başında başqası da olsaydı, torpaqlarımızı güc yolu ilə geri qaytarmaqdan başqa alternativimiz yox idi”
Ermənistan Xarici İşlər Nazirliyinin keçmiş rəhbəri Baş nazir Nikol Paşinyana cavab verib və ona Qarabağ üzrə danışıqların mahiyyətini başa salıb. Sabiq xarici işlər naziri Vardan Oskanyan bildirib ki, Madrid prinsipləri o demək idi ki, Qarabağ Azərbaycanın bir hissəsi deyil və Nikol Paşinyanın mühakimələri kökündən yanlışdır. 10 il erməni diplomatiyasına rəhbərlik edən və danışıqlar prosesinin bütün nüanslarını bilən Oskanyan qeyd edir ki, Madrid prinsipləri Nikol Paşinyanın dediklərinin tam əksini nəzərdə tutur.
Sabiq nazir əmindir ki, əgər Paşinyan 44 günlük müharibədən əvvəl onu dinləsəydi, o zaman hadisələr tamam başqa istiqamətdə inkişaf edə bilərdi. Nazir diqqətə çatdırıb ki, Ermənistanın maraqlarından irəli gələn "status", "referendumun keçirilməsi" və "Ermənistanla quru dəhlizi" ilə bağlı bütün müddəalar erməni tərəfinin səyi ilə Madrid prinsiplərində təsbit edilib. Keçmiş nazir bildirib ki, Paşinyanın Madrid prinsipləri ilə bağlı məntiqini başa düşmək çətindir. Oskanyanın iddialarına görə, hakimiyyət özünə haqq qazandırmaq üçün keçmişin "nailiyyətlərini tozlayır". Qeyd edək ki, ötən gün hökumətin iclasında çıxış edən Nikol Paşinyan demişdi ki, "Madrid prinsiplərindən sonra Ermənistan tərəfinin “parlaq” diplomatiyası nəticəsində Azərbaycan Qarabağın öz müqəddəratını təyin etdiyi məkana çevrilib". Baş nazirin sözlərinə görə, Madrid prinsiplərinə görə, Ermənistan Qarabağı Azərbaycanın tərkib hissəsi kimi tanıyıb və onlar “bu gün həmin sənədin meyvələrini yığırlar”.
"Atlas" Araşdırmalar Mərkəzinin rəhbəri Elxan Şahinoğlu "Şərq"ə deyib ki, 1990-cı illərdə jurnalist işlədiyi dövrdə Vardan Oskanyandan geniş müsahibə götürüb. Analitikin sözlərinə görə, Oskanyan özündən razı və təkəbbürlü diplomat idi: "Torpaqlarımız işğal altında idi, beynəlxalq birlik İrəvana heç nə demirdi. BMT-nin 4 qətnaməsi yerinə yetirilmirdi və bütün bunları Oskanyan özünün uğur xanasına yazırdı. Halbuki münaqişənin həllini uzatmaqla həmin Oskanyan və onun xidmət etdiyi rejim bütün hallarda müharibəni qaçılmaz edirdi. Oskanyan bir məsələdə haqlıdır ki, “Madrid planı” Azərbaycan üçün faydalı deyildi. Elə bunun özü müharibə ehtimalını artırırdı. Oskanyan indi deyir ki, guya, Nikol Paşinyan səhvlər buraxmasaydı, müharibə olmayacaqdı və ermənilər torpaqları əvvəlkitək işğal altında saxlayacaqdılar. Əlbəttə, Paşinyanın Şuşada içkili vəziyyətdə yallı oynaması, tez-tez Qarabağa gəlişləri, “Qarabağ Ermənistandır” kimi ifadələri müharibənin başlama tarixini yaxınlaşdırırdı. Ermənistanın başında başqası da olsaydı, hamımız anlayırdıq ki, torpaqlarımızı güc yolu ilə geri qaytarmaqdan başqa alternativimiz yox idi. Sadəcə, Paşinyan müharibənin başlaması tarixini yaxınlaşdırdı".
