Xarici İşlər Nazirliyi Almaniyanın "Borussiya Dortmund” komandasının futbol üzrə Avropa Liqasının qrup mərhələsində iştirakı ilə əlaqədar Azərbaycana səfərinə dair KIV-in sorğusunu cavablandırıb. XİN-nin mətbuat xidmətinin rəhbəri Hikmət Hacıyev "Qəbələ" komandası ilə eyni qrupa düşən Almaniyanın "Borussiya" (Dortmund) komandasının erməni futbolçusu Henrix Mxitaryanın Azərbaycana buraxılmayacağına dair iddialara cavab verərək deyib ki, son 10 ildə Azərbaycanda 300-dən artıq beynəlxalq xarakterli müxtəlif idman yarışları keçirilib. Bunların sırasında London Olimpiadasına lisenziya xarakterli gənclər arasında boks üzrə 3-cü dünya çempionatı, sərbəst, yunan-roma və qadın güləşi üzrə Avropa çempionatı, Boks üzrə XVI Dünya Çempionatı, Cüdo üzrə "World Masters" beynəlxalq turniri, eləcə də Grand-Prix və Grand-Slam yarışlarını, habelə bədii Gimnastika üzrə Avropa Çempionatlarını, Atıcılıq üzrə Qəbələ Beynəlxalq turniri və başqalarını göstərmək olar: "Yalnız son beş ildə Azərbaycanın ev sahibliyi etdiyi bu kimi mötəbər idman yarışlarında və ölkəmizdə uğurla keçirilmiş birinci Avropa Oyunlarında Ermənistandan və əslən erməni olaraq digər ölkələri təmsil edən 100-dən artıq idmançı iştirak edib.
Qarşıdan gələn illərdə də ölkəmizdə bir sıra mötəbər idman yarışlarının keçirilməsi nəzərdə tutulub.
Çox sevindirici haldır ki, Avropa Liqasının qrup mərhələsinə ölkəmizin futbol klubları da vəsiqə qazanıblar. Bu kimi yarışlarda iştirak edərək hər bir dövlət UEFA-nın müəyyən etdiyi ümumi qaydalardan çıxış edir və bu qaydalar əsasında oyunlara ev sahibliyi edir. Futbol idman növünün xarakterik xüsusiyyətlərindən biri onun komanda formasında olmasıdır. Burada ayrı - ayrı fərdlər deyil, ümumi komanda yanaşması əsas götürülür. Oyunlardan asılı olaraq, "Borussiya Dortmund" klubunun Azərbaycana səfəri də ayri-ayrı fərdlərin deyil, komandanın səfəri xarakteri daşıya bilər.
İdman ilə siyasət arasında müəyyən ümumi cəhətlərin olmasına baxmayaraq, Azərbaycanın mövqeyi ondan ibarətdir ki, idman ilə siyasət eyniləşdirilməməli və idman siyasi məqsədlər üçün istifadə edilməməlidir.
Arzuolunmaz şəxslər siyahısına gəldikdə isə burada bir hal fərdi qaydada nəzərdən keçirilir”.