ABŞ-ın Yuta ştatının qubernatoru Qeri R. Herbert martın 2-də Xocalı qətliamının ildönümü ilə bağlı məktub imzalayıb.
Azərbaycanın Los Ancelesdəki baş konsulluğundan Lent.az-a verilən məlumata görə, konsul Nəsimi Ağayevə ünvanlanmış məktubda qubernator, Xocalı qətliamının 23-cü ildönümü ilə əlaqədar bu qətliam zamanı uşaq və qadınlar da daxil olmaqla 600-dən çox insanın öldürüldüyünü bildirərək, Yutada, eləcə də bütün dünyada yaşayan azərbaycanlılara Yuta ştatının əhalisi adından başsağlığı verdiyini qeyd edib.
Məktubda bildirilib ki, bu faciəvi hadisə müharibə zamanı törədilən vəhşilikləri bir daha yada salır və müxtəlif dini, irqi, etnik, milli və mədəni kimliklərə məxsus insanlar arasında daha çox qarşılıqlı anlaşmanın, ünsiyyətin və dözümlülüyün nə qədər zəruri olduğunu göstərir.
Qubernator sonda Azərbaycan və ABŞ xalqları arasında müxtəlif körpülərin qurulması işinə verdiyi töhfələrə görə Azərbaycanın Los Ancelesdəki Baş Konsulluğuna təşəkkür edib.
Qeyd edək ki, bu, Yutah Qubernatoru tərəfindən Xocalı qətliamının tanınması ilə bağlı imzalanmış ilk rəsmi sənəddir. Bununla ABŞ-da Xocalı qətliamını tanıyan ştatların sayı 17-yə çatıb.
