"Rusiyaya qarşı yeni sanksiyalar yaxın gələcəkdə tətbiq ediləcək, Vaşinqton artıq onların üzərində işləyir”. Bunu ABŞ-ın maliyyə naziri Stiven Mnuçin deyib. Nazir bildirib ki, əlavə sanksiyalar tətbiq etmək üçün, daha əvvəl elan edilmiş hesabat və kəşfiyyat məlumatlarından istifadə ediləcək: "Hazırda onların üzərində çalışırıq”.
Maliyyə naziri sanksiyaların tətbiq olunacağı tarixi açıqlamaq istəməyib: "Bunu mümkün qədər tez edəcəyik, ola bilsin ki, bu bir neçə ay, ya da ki bir ay çəksin”. Xatırladaq ki, ABŞ Maliyyə Nazirliyi bundan əvvəl "Kreml hesabatı”nı təqdim edib. Həmin sanksiya Rusiya prezidentinin yaxın ətrafını, iri sahibkarları və dövlət şirkətlərini əhatə edib. Bir sıra ekspertlərin fikrincə, ardıcıl sanksiyalar Amerika və Rusiya arasında növbəti gərginliyin, hətta "soyuq müharibə” dövrünün yeni mərhələsinin başlanğıcı ola bilər.
Prosesləri "Şərq”ə dəyərləndirən Qərb Universitetinin professoru, politoloq Fikrət Sadıqov deyib ki, hələlik sözügedən sankiyalar tətbiq edilməyib. "Kreml hesabatı”na diqqət çəkən politoloqun sözlərinə görə, siyahıda Rusiyanın siyasi və iqtisadi elitasının, o cümlədən aparıcı müəssisələrin adı qeyd olunub:
"Layihə Konqresin müzakirəsinə göndərilib. Demək olar ki, sanksiya məruzəsində sadəcə prezident Vladimir Putinin adı yoxdur. Hələlik tətbiq olunmasa da, bunun gündəmə gətirilməsinin özü tərəflərin qarşıdurmasının, ABŞ-Rusiya arasındakı soyuq müharibənin yeni mərhələsinin başlanması üçün yetərlidir. Düşünmürəm ki, gərgin vəziyyət hansısa münaqişəyə, müharibəyə səbəb olsun. Ancaq reallıq odur ki, gərginlik nə ABŞ-a, nə də ki Rusiyaya fayda verir. Beynəlxalq münasibətlərin yaxın tarixi göstərir ki, güclü tərəflərin uzun müddət qarşıdurma şəraitində olması təkcə onların özünə deyil, digər dövlətlərə də mənfi təsir edir. Amerika və Rusiyanın müttəfiqləri də bundan ziyan çəkir. Gərgin münasibətlər nəticəsində ABŞ və Rusiyanın bəzi regionlardakı birgə əməkdaşlığı, razılığı da pozulur. Çox güman ki, Amerikanın sanksiyalarına Rusiya tərəfi də hansısa formada cavab verəcək. Putinin bəyanatı da Kremlin səssiz qalmayacağını ortaya qoyur”.
İsmayıl
