Türkiyənin baş naziri Əhməd Davudoğlu dini azlıqların təmsilçiləri ilə görüşündə Qarabağ problemi, habelə Ermənistan-Türkiyə sərhədinin açılması ilə bağlı maraqlı fikirlər səsləndirib. Ə.Davudoğlunun sözlərinə görə, Türkiyə son günlərə qədər hətta bir rayonun azad edilməsi qarşılığında belə Ermənistanla sərhədləri açmağa hazır idi: "Ermənistan Qarabağdakı bircə rayondan geri çəkilsəydi, sərhədi açacaqdıq. Amma bu, olmadı”.
Davudoğlunun məlum açıqlaması Türkiyənin həqiqətən də regionda sülh və təhlükəsizliyin təmini üçün kompromisə hazır olduğunu göstərməklə yanaşı, rəsmi Ankaranın Qarabağ problemi ilə bağlı mövqeyini də gündəmə gətirib. Rusiyanın "Vestik Kafkaz” nəşri Davudoğlunun bu çıxışını şərh edərkən Ermənistanda məsələyə birmənalı münasibət olmadığını yazıb. Lakin erməni politoloq ölkədə bunun əksini düşünənlərin olduğunu da istisna etməyib. Onun sözlərinə görə, açıq şəkildə dilə gətirilməsə də, Rusiyanın təsirindən qurtulmaq üçün Türkiyəyə xilas yolu kimi baxanlar var. Davudoğlunun açıqlaması Azərbaycan cəmiyyətində də birmənalı qarşılanmayıb. İnsanların bəzisi bunu Türkiyənin Qarabağ məsələsindəki qeyri-prinsipial mövqeyi kimi qəbul edib. Maraqlıdır, Davudoğlunun açıqlaması Azərbaycanın maraqlarına nə dərəcədə cavab verir və bu, Türkiyənin Qarabağ məsələsindəki qeyri-prinsipiallığı kimi dəyərləndirilə bilərmi?
"Borçalı” Cəmiyyətinin sədri, tanınmış ictimai-siyasi xadim Zəlimxan Məmmədli baş nazirin açıqlamasını tamamilə normal qəbul etdiyini və burada Azərbaycanın maraqlarına zidd bir şey görmədiyini vurğulayıb: "Türkiyənin Qarabağ probleminə mövqeyi birmənalıdır və buna görə də ayrı-ayrı dövlətlərin təzyiqləri ilə üzləşməkdən çəkinmir. Bəlkə də türk birliyinin kökü buradadır. Bu vəhtəd dayanıqlı olarsa, xəyallarda qurduğumuz birlik gerçəkliyə çevrilər. Hörmətli Davudoğlunun bu ifadəsi düşünülmüş diplomatik ifadədir. Baş nazir anlatmaq istəyir ki, Ermənistan destruktivdir, pozucudur. Belə olmasaydı, heç olmasa, bir rayonun azad olunmasına razı olardı. Bu ifadədə siyasətlə məşğul olan birisi kimi Azərbaycana sayğısızlıq adına heç nə görmürəm”.
Politoloq Toğrul İsmayıl da açıqlamasında deyib ki, sərhədin açılması ermənilərə də, Türkiyəyə də sərf edir: "Bununla Ermənistan düşdüyü acınacaqlı vəziyyətdən çıxa bilər. Əlbəttə, Türkiyənin də burda regional maraqları var. Lakin rəsmi Ankara dəfələrlə bəyan edib ki, Ermənistan bunun üçün işğalçı siyasətindən imtina etməlidir. Ən azından işğal etdiyi Azərbaycan torpaqlarının bir qismini boşaltmalıdır. Davudoğlunun bu açıqlaması Ermənistana jestdir. Türkiyə etdiyi jestin cavabını gözləyir”. Politoloq qeyd edib ki, Türkiyə ilə Ermənistan sərhədləri 1993-cü il Kəlbəcərin işğalından sonra bağlanıb: "O vaxtdan Türkiyə Ermənistana dəfələrlə çağırış etsə də, İrəvan reaksiya verməyib. Ermənistan Türkiyədən ilkin şərt olmadan danışıqlar aparmağı tələb edir. Hansı ki, burda ilkin şərtdən yox, bütöv bir təcavüzdən söhbət gedir. Ermənistan qondarma soyqırım iddialarından əl çəkməli və işğal etdiyi əraziləri boşaltmalıdır. Qonşularına qarşı özünü yaxşı aparmalıdır. Lakin Ermənistan Azərbaycana, Türkiyəyə və Gürcüstana qarşı ərazi iddiaları irəli sürür. Bu, beynəlxalq hüquqa ən pis yanaşmadır. Buna görə də Ermənistan aclıq məngənəsindən yalnız daha sivil ölkə olacağı təqdirdə qurtula bilər”.
İsmayıl
