"Beynəlxalq təşkilat rəsmilərinin Azərbaycana səfəri ölkəmizin getdikcə artmaqda olan rolu və nüfuzu ilə əlaqədardır”.
Bunu "Sherg.az”a ATƏT Parlament Assambleyasının (PA) prezidenti Georgi Tseretelinin Azərbaycana səfəri haqqında danışarkən politoloq Elşən Manafov söyləyib.
Onun sözlərinə görə, Azərbaycan mürəkkəb dünyada sabit ölkə olaraq qalıb:
"Xarici ölkələrin investisiya yatırması üçün ən təhlükəsiz ölkələrdən biri məhz Azərbaycandır. Həmçinin Azərbaycanın Avropaya inteqrasiyası amilləri də beynəlxalq təşkilatların diqqətini çəkir. Tranzit yollarının üzərində yerləşən ölkə olduğuna görə, Azərbaycan vasitəsilə Avropadan Asiyaya aparıla bilən malların çatdırılma müddəti iki-üç həftə qısaldılır. Bu da transmilli şirkətlər üçün ciddi önəm kəsb edən müddətdir. Ona görə, Azərbaycanın geostrateji mövqeyi dünya dövlətlərinin diqqətində olub.
Cənub Qaz Dəhlizinin istismara verilməsindən sonra Azərbaycan ciddi iqtisadi dividentlərlə yanaşı siyasi dividentlər də əldə edəcək. Avropa enerjiyə olan ehtiyacını şaxələnmiş yollarla təmin edir. Avropanın əsas problemi enerji məsələsində Rusiyadan asılılığı azaltmaqdır. Bu baxımdan Azərbaycan adıçəkilən kəmərlərin də istifadəyə verilməsindən sonra Avropanın enerji təminatında əsas dövlətlərdən birinə çevrilə bilər.
Nəhayət, Cənubi Qafqazın bütövlükdə uğurlu şəkildə Avropaya inteqrasiyası Azərbaycanın da bu prosesə qoşulmasına şərait yaradır. Azərbaycan Cənubi Qafqazda dövlətlər arasında müstəqil, suveren dövlət siyasəti yeridən dövlət təsiri bağışlayır. Azərbaycanın regional dövlət olaraq, müstəqil siyasət yeritməsi, atdığı qəti addımlar, Avropa ilə əməkdaşlığı genişləndirmək əzmi Avropa institutlarının diqqətindən yayınmır. Buna görə, Azərbaycana olan marağın güclənəcəyini düşünürəm".
Aysel Aslan
