"AŞPA-nın Azərbaycan üzrə həmməruzəçilərinin ölkəmizə səfəri ənənəvi xarakter daşıyır”.
Bu sözləri "Sherg.az”a AŞPA Monitorinq Komitəsinin Azərbaycan üzrə həmməruzəçisi Stefan Şennakın ölkəyə səfər planı haqqında danışarkən "Xalq Cəbhəsi" qəzeti qəzetinin baş redaktoru, politoloq Elçin Mirzəbəyli deyib.
O diqqətə çatdırıb ki, Azərbaycan Avropa Şurası, Avropa İttifaqı və onun ayrı-ayrı qurumları ilə münasibətlərin yaxşılaşlması istiqamətində addımlar atır:
"Bu kontekstdə Azərbaycan indiyə qədər üzərinə düşən öhdəlikləri yerinə yetirib. S.Şennakın vurğuladığı kimi məhbusların azad olunması sahəsində də tədbirlər görülüb. Çoxlu sayda əfv sərəncamları, humanist addımlar atılıb. Eyni zamanda amnistiya aktları imzalanıb. Azərbaycan Prezidentinin sərəncamı ilə cəzaların yüngülləşdirilməsi sahəsində işlər görülüb. Artıq müvafiq qurumlar və qanunverici orqanlar da cəzaların dekriminallaşdırılması prosesinə uyğun addımlar atır.
Hesab edirəm ki, ölkəmiz hər hansı Avropa təşkilatının yanaşmasına ehtiyac duymadan özü lazım olan islahatları həyata keçirir. Amma təbii ki, islahatların aparılmasında müvafiq hüquqi yardım, məsləhətləşmələr hər zaman gərəklidir. Azərbaycan və Avropa təşkilatlarının bu aspektdən əməkdaşlığına ehtiyac var”.
Qeyd edək ki, S. Şennak "Novruz bayramı gəlir, həmçinin seçkilər və Azərbaycanın müstəqilliyinin 100 illiyi yaxınlaşır. Biz çoxlu sayda məhbusun azad ediləcəyinə ümid edirik”, - deyə vurğulayıb.
Aysel Aslan
