Dövlət Gömrük Komitəsinin sədri Aydın Əliyev jurnalistlərə açıqlamasında bildirib ki, Azərbaycana qonşu ölkələrdən müvəqqəti olaraq köhnə avtomobillər gətirilir və bəzi hallarda burada ehtiyat hissələri çıxarılaraq satılır: "Bu yalnız Gürcüstana yox, bütün qonşu ölkələrə şamil edilir”.
Komitə sədrinin sözlərinə görə, bu səbəbdən artıq bir neçə aydır qurum qonşu ölkələrdən bu cür avtomobillərin gətirilməsi üçün ölkə daxilində zamindurma tələbi irəli sürüb.
İqtisadçı-ekspert Natiq Cəfərlinin qənaətincə, belə halların qarşısını almaq üçün Dövlət Gömrük Komitəsi gömrük rüsumu məsələsinə baxaraq Azərbaycana gətirilən avtomobil ehtiyat hissələrinin ölkəyə sərbəst keçidinə icazə verməlidir: "Çünki Azərbaycanda avtomobil ehtiyat hissələri istehsal olunmur. Əgər avtomobil ehtiyat hissələrinin ölkəyə gətirilməsinə tam icazə verilərsə, bunun satışı ilə məşğul olan şəxslərin sayı artar. Həm də belə malların qiyməti ucuzlaşar. Qiymətlər ucuzlaşdıqca, köhnə avtomobillərdən ehtiyat hissələrinin çıxarılıb satılması kimi halların qarşısı alınar”.
N.Cəfərli ehtiyat hissələrinin baha olmasını birbaşa gömrükdə tətbiq edilən rüsumla əlaqələndirib: "Buna görə də yeni ehtiyat hissələrinin qiymətləri yüksəkdir və sürücülər köhnə avtomobillərin ehtiyat hissəsini almağa üstünlük verirlər. Təbii ki, hər bir şəxs, elə mən də sürücü kimi yeni və keyfiyyətli ehtiyat hissəsi almaq istəyərik. Lakin qiymətlərin münasib olmaması buna imkan vermir”.
Ekspert təklif edir ki, qadağalar və yeni qaydalar tətbiq etməklə yox, iqtisadi vasitələrlə problem həll edilsin: "Bu zaman gömrük rüsumları kifayət qədər aşağı olarsa və bu sektorda rəqabətli mühit yaranarsa, həm gömrük rüsumlarından, həm də gətirilən ehtiyat hissələrinin satışından gəlir vergisi tətbiq etmək dövlət büdcəsinə daha çox gəlir gətirmək mümkündür”.
Vüqar Şahinoğlu
