"ABŞ Avropa Birliyinin enerji təhlükəsizliyinin formalaşmasında maraqlıdır”.
Bu sözləri "Sherg.az”a "Cənub Qaz Dəhlizi” layihəsinin həyata keçirilməsində ABŞ hökumətinin dəstəyindən danışarkən iqtisadçı - ekspert Vüqar Bayramov deyib.
O vurğulayıb ki, birmənalı şəkildə ABŞ buna dəstək olmağa çalışır:
"Avropanın enerji təhlükəsizliyinin təmin olunması ABŞ-ın ən yaxın müttəfiqlərinin qorunması anlamına gəlir.
Bu baxımdan Cənub Qaz dəhlizi Avropanın enerji təhlükəsizliyində mühüm faktorlardan biridir. Donald Tramp tərəfindən bu layihənin dəstəklənməsi Amerikanın maraqlarına uyğundur.
Cənub Qaz dəhlizi qədim qitənin enerji təhlükəsizliyinin formalaşmasına müsbət təsir edəcək. O baxımdan, ABŞ-ın bu layihəyə dəstək göstərəcəyi istisna deyil”.
Qeyd edək ki, ABŞ Dövlət Departamentinin Enerji Ehtiyatları Bürosunun beynəlxalq enerji məsələləri üzrə xüsusi elçisi və əlaqələndiricisi vəzifəsini icra edən Syu Saarnio Azərbaycana səfər edib. Səfər çərçivəsində ölkə başçısı İlham Əliyevlə görüşən Syu Saarnio ABŞ prezidentinin, dövlət katibinin, ABŞ hökumətinin "Cənub Qaz Dəhlizi” layihəsinə dəstəyindən danışıb. O, bu layihənin başa çatmaqda olmasının önəmini qeyd edib.
Aysel Aslan
