"Azərbaycanda 2009-cu ildə xüsusi iqtisadi zona haqqında qanun qəbul olunub. Amma həyata keçirilməyib”.
Bunu "Sherg.az”a Ələtdə yaradılacaq azad iqtisadi zonanın əhəmiyyətindən danışarkən iqtisadçı, millət vəkili Vahid Əhmədov deyib.
O bildirib ki, azad iqtisadi zonanın yaradılması Azərbaycana investisiya axının artırılmasına xidmət edir:
"Müzakirə olunması planlaşdırılan yeni qanun layihəsi isə tamam fərqlidir. Yeni qanunda azad iqtisadi zonalara nəzarət mexanizmi yoxdur, gömrük, vergi rüsumlarından azaddır. Azad iqtisadi zonalar sərbəstdir, istənilən qədər valyuta gətirib, apara bilərlər. Sadəcə təhlükəsizliklə bağlı məsələlər, narkotik satışı, qaçaqmalçılıq kimi hallar nəzarətdə saxlanacaq ki, problemlər olmasın.
Azad iqtisadi zonanın Ələtdə yaradılması ona görə önəm kəsb edir ki, nəqliyyat dəhlizi olaraq əhəmiyyətli regiondur. Orada böyük liman tikilir. Həmin limana diqqət böyükdür. Türkiyə, Orta Asiya, digər ölkələr maraq göstərirlər. Bu baxımdan həmin bölgədə azad iqtisadi zonanın təşkili investisiya yatırımı üçün əlverişli olacaq. Fəaliyyətindən asılı olaraq, başqa bölgələrdə də azad iqtisadi zona yarada bilərik”.
Aysel Aslan
