"Adi ağrıkəsici dərmanın, resept əsasında antibiotikin 14 yaşdan aşağı şəxsə satılması problem yaratmaz”.
Bu barədə "Sherg.az”a "Borçalı" İctimai Birliyinin sədri, həkim Zəlimxan Məmmədli bildirib. O qeyd edib ki, 14 yaşına çatmamış şəxslərə dərman satışının qadağan edilməsi narkotikə qarşı mübarizə üçün də effektiv deyil:
"Əczaçılıq sahəsində istənilən dərmanın kodunu, tərkibini dəyişmək olur. Avropa dövlətlərinin bəzi dərmanlarla bağlı ciddi qaydalar qoyulub. Həmin dərmanları tək uşaqlar deyil, böyüklər də aptekdən ala bilmir. Həkimin yazdığı resept onlayn şəkildə birbaşa aptekə göndərilir və aptek onu həmin şəxslərə çatdırır. Bu ona hesablanır ki, vətəndaş özbaşına özünə müalicə təyin etməsin. Əhalinin tibbi təhlükəsizliyini qorumaq üçün həkim təyinatı olmadan dərmanlar satılmır. Ona görə, sözügedən "Dərman vasitələri haqqında” qanuna edilən dəyişikliyin heç bir hüquqi, ictimai, tibbi əhəmiyyətini görmürəm.
Doğru qeyd olunur ki, elə insanlar var, övladı ilə tək yaşayır, yaxud ailə aztərkiblidir. Valideyn xəstələndikdə məcbur olub, həkim reseptini övladına verir, yaxınlıqdakı aptekə göndərir. Edilən dəyişiklik qüvvəyə mindiyi vaxtdan bu kimi hallarda insanlar üçün problem yaranacaq”.
Qeyd edək ki, Milli Məclisin bugünkü iclasında çıxış edən millət vəkili Elmira Axundova "Dərman vasitələri haqqında” Azərbaycan Respublikasının Qanununda dəyişiklik edilməsi barədə qanun layihəsinin 13-cü, "Dərman vasitələrinin buraxılması” haqqındakı maddəsində edilən dəyişikliklərdən danışıb. O vurğulayıb ki, bütün dərman vasitələrinin 14 yaşına çatmamış yeniyetmələrə satılmasının qadağan edilməsi düzgün deyil.
Aysel Aslan
