"Reproduktiv sağlamlığın qorunması haqqında” qanun layihəsi bəzi çətinliklər səbəbindən cari ildə də müzakirəyə çıxarılmayacaq”.
Bu barədə Milli Məclisin Sosial siyasət komitəsinin sədri, millət vəkili Hadı Rəcəbli bildirib. Onun sözlərinə görə, bəhs olunan qanun layihəsi 6-7 ildir müzakirə edilir: "Göstərilən qanunda bu məsələlər ehtiva edilib və problemlərin böyük əksəriyyəti öz həllini tapıb. Lakin həmin qanun çərçivə qanunudur. Biz istədik ki, konkret bir sahəyə girək. Ölkədə ayrı-ayrı xəstəliklər haqqında qanunlar var. İstədik ki, reproduktiv sağlamlıq barədə məsələni də konkretləşdirək. Burada bir az çətinlik olduğuna görə qaldı və bu il müzakirəsi olmayacaq”.
Həmkarının açıqlamasını dəyərləndirən Milli Məclisin Sosial siyasət komitəsinin sədr müavini, millət vəkili Musa Quliyev "Şərq”ə açıqlamasında qeyd edib ki, onlara çətinlik törədən donorluq məsələsidir: "Bu, təzə iş deyil. 1996-cı ildə qəbul olunmuş "Əhalinin sağlamlığının qorunması haqqında” qanunda yazılıb ki, Azərbaycanda donorluğa icazə verilir. "Reproduktiv sağlamlığın
qorunması haqqında” qanun isə onun daha geniş hüquqi əsaslarını və təminatlarını yaratdı. Amma Qafqaz Müsəlmanları İdarəsi qanuna çox sərt təpki verdi. Parlamentə məktub göndərdi ki, bu, islam adət-ənənələrinə ziddir. Bildirildi ki, qadının yumurtasının ərindən başqa bir donor kişinin nütfəsi ilə birləşdirilərək süni mayalanma yolu ilə hamilə edilməsi haramdır. Və bu yolla doğulan uşaqlar haramzadə sayılır. Şəriət normalarına görə vərəsəlik hüququndan məhrum olur. Parlament üzvləri də konkret qənaətə gələ bilmirlər. İndiki halda donorluğun qalması və ya çıxarılmasına dair konkret siyasi iradə olsa, hər şey dəqiqləşər. Məsələnin müzakirəyə çıxarılmasını ləngidən bax budur”.
Ayyət Əhməd
