Martın 10-da Dövlət Sərhəd Xidmətinin Sərhəd Qoşunlarının "Horadiz” sərhəd dəstəsinin Fizuli rayonunun Bala Bəhmənli kəndinin yaxınlığındakı sərhəd zastavasının xidməti ərazisində dövlət sərhədinin pozulmasına cəhd edilib. Dövlət Sərhəd Xidmətinin məlumatına görə, sərhəd naryadı tərəfindən İrandan Azərbaycan istiqamətində silahlı şəxslərin hərəkəti aşkar olunub və qarşısı alınıb. Azərbaycanın dövlət sərhədinin mühafizəsində olan sərhəd naryadının qanuni tələbinə və xəbərdarlıq atəşinə tabe olmayan sərhəd pozucuları tərəfindən sərhəd naryadına qarşı silah tətbiq edilib. Baş vermiş atışma zamanı sərhəd naryadının başçısı Daşkəsən rayonundan həqiqi hərbi xidmətə çağırılmış kiçik çavuş Məmmədov Səxavət Fizuli oğlu sinəsindən güllə yaraları alıb, sərhəd naryadının üzvü Siyəzən rayonundan həqiqi hərbi xidmətə çağırılmış əsgər Cəbrayılov Vidadi Xəlifəqulu oğlu əlindən yaralanıb. Hər iki sərhədçi dərhal hərbi hospitala təxliyə olunsa da, kiçik çavuş S.Məmmədovun həyatını xilas etmək mümkün olmayıb. Dövlət sərhədini pozmağa müvəffəq ola bilməyən sərhəd pozucuları geri qaçıblar.
Hadisədən dərhal sonra Dövlət Sərhəd Xidmətinin rəisi general-polkovnik Elçin Quliyev və digər vəzifəli şəxslər əraziyə gəlib, hadisə yerinə baxış keçirilib, əməliyyat-axtarış tədbirlərinin davam etdirilməsinə dair zəruri tapşırıqlar verilib.
Dövlət Sərhəd Xidmətinin rəhbər heyəti dövlət sərhədini mühafizə edərkən qəhrəmancasına həlak olmuş kiçik çavuş S.Məmmədovun atası ilə görüşüb və başsağlığı veriblər.
Dövlət Sərhəd Xidmətinin rəisinin əmri ilə kiçik çavuş Məmmədov Səxavət Fizuli oğlu (ölümündən sonra) və əsgər Cəbrayılov Vidadi Xəlifəqulu oğlu xidməti vəzifələrinin icrasında göstərdikləri şücaətə görə "Hərbi xidmətdə fərqlənməyə görə” 3-cü dərəcəli medalı ilə təltif olunublar.
Hadisə ilə əlaqədar Hərbi Prokurorluqla birlikdə zəruri tədbirlər həyata keçirilir. Fakt üzrə cinayət işi başlanılıb.
Məsələ ilə bağlı açıqlama verən Təhlükəsizlik məsələləri üzrə tanınmış ekspert Elmar Nurəliyev deyib ki, hər bir dövlətin hüdudları onun sərhədindən başlayır. Sərhədlərin inamlı, etibarlı qorunması dövlətin, onun vətəndaşlarının rahat və təhlükəsiz yaşamasını təmin edir:
"Ümumiyyətlə, sərhəd pozucularının niyyəti heç də xoş olmur. Onlar ölkə ərazisinə qanunsuz, sərhədi pozmaqla girməklə öz çirkin, qanunazidd əməllərini həyata keçirmək istəyirlər. Ona görə bu şəxslər hər şeyi gözə alır, sərhəd keşikçilərinin qanuni tələbinə əməl etməyərək onlara silahlı müqavimət də göstərirlər. Azərbaycan dövlətinin sərhədləri ən son model texnoloji avadanlıqlarla təchiz edilmiş, istənilən hava şəraitində, günün bütün saatlarında - gündüz, yaxud gecə, fərq etməz, sərhədi qanunsuz keçməyə cəhd etmə hallarını aşkar etmək və aidiyyəti üzrə tədbirlər görmək qabiliyyətinə malikdir. Son hadisə də onu göstərdi. Sərhədi qanunsuz keçməyə cəhd edən silahlı şəxslər sərhəd naryadının xəbərdarlığına məhəl qoymayaraq onlara qarşı silah tətbiq edib, nəticədə bir hərbi qulluqçu şəhid olub, digəri isə yaralanıb, sərhəd pozucuları isə istəklərinə müvəffəq ola bilməyərək geri qaçıblar. Bundan qabaq da dövlət sərhədini qanunsuz keçmək istəyənlərin qarşısı dəfələrlə alınıb və biz inanırıq ki, bundan sonra da dövlət sərhəd xidmətinin hərbi qulluqçuları dövlət sərhədlərini inamla, etibarla, əzmlə qoruyacaq”.
Şəymən
