Ermənistanın nəqliyyat, rabitə və informasiya texnologiyaları naziri Akop Arşakyan iri investisiya layihəsinə veto qoyub. Belə ki, Rusiyada yaşayan erməni sahibkar Artur Yerznkyan Ermənistanda telekommunikasiya və rabitə sahəsinə 200 milyon dollar investisiya yatırmağı planlaşdırıb. Sahibkarın məqsədi yeni mobil rabitə operatoru yaratmaq olub.
O, mobil rabitəni abonentlər üçün ucuz, sərhəd rayonlarının sakinləri üçün isə, demək olar, havayı etməyə hazır olduğunu deyib.
Erməni KİV-in məlumatına əsasən, lakin A.Arşakyan layihənin reallaşdırılmasına icazə verməyib. Nazir bildirib ki, həmin layihə mövcud 3 operatora mane olacaq və guya sahibkar özü də xeyir götürməyəcək.
Yerli mətbuat isə vəziyyəti belə izah edir: "Elə buna görə də Ermənistan investisiyaların həcminə görə regionda sonuncudur və Azərbaycanla Gürcüstanda xeyli geri qalır".
Politoloq Qabil Hüseynli hesab edir ki, erməni mətbuatının yazdıqları həqiqətəuyğundur. Keçmiş dövlət müşaviri "Sherg.az”a açıqlamasında qeyd edib ki, Ermənistanın hazırkı hakimiyyəti əvvəlki xunta rejimi olan Serj Sarkisyanın yolu ilə gedir:
"Baş nazir Paşinyan də Sarkisyanın siyasətini davam etdirir. Erməni KİV-lərinin də yazdığı kimi, azad sahibkarlıq boğulur, insanlara istehsalatda problemlər, bürokratik əngəllər yaradılır. Bu da Ermənistanda korrupsiyanın davam etdiyinin göstəricisidir. Korrupsiya Sarkisyan dönəmində də var idi, indiki Paşinyan hakimiyyəti də bu siyasəti davam etdirir”.
Politoloq vurğulayıb ki, Ermənistanın hər zaman hər sahədə Azərbaycandan geri qalır:
"Birincisi Azərbaycanın güclü ordusu var ki, Ermənistanı bir neçə günə yerlə-yeksan edər. Azərbaycan bu gün özü müasir silah istehsalçısıdır. Bu baxımdan Ermənistanı Azərbaycanla müqayisə etmək gülüncdür. İkincisi Azərbaycanda azad sahibkarlıq var ki, bu da davamlı iş yerləri deməkdir, əhalinin sosial rifahı deməkdir, büdcəyə vergi deməkdir. Ermənistanın nəyi var?”.
Düşmən ölkədə sosial vəziyyətin hər gün bir az da ağırlaşacağını proqnozlaşdıran Q.Hüseynli bildirib ki, Paşinyanın yeganə yolu işğal etdikləri Azərbaycan ərazilərini azad etməkdir:
"Paşinyan insanlarının yaxşı yaşamasını, Ermənistanın həqiqətən də inkişafında maraqlıdırsa, o zaman işğalda saxladıqları Dağlıq Qarabağ və ətraf rayonları qaytarmalıdır. Bundan sonra Azərbaycanla da, Türkiyə ilə də sərhədlər açılacaq, Ermənistan beynəlxalq layihələrdə iştirak edəcək. Əks təqdirdə, sosial problemlər Paşinyan hakimiyyətini də, Ermənistanı da çökdürəcək”.
Anar
