"Orta məktəblərdə qiymətləndirilmənin çox olması, müəllimlərin yazı-pozu işini artırır”.
Bunu "Sherg.az”a məktəblərdə summativ qiymətləndirmə ilə bağlı dəyişikliklərin edilməsindən danışarkən Azad Müəllimlər Birliyinin sədri Məlahət Mürşüdlü deyib.
O vurğulayıb ki, prosedurların çox olması qiymətləndirməni formalizmə aparır:
"Ona görə, bunun sadələşdirilməsi ilə bağlı müzakirələr aparılır. Dəqiq sənəd ortaya qoyulmayıb və ictimai müzakirəsi də yoxdur. Sadəcə mətbuatdan oxuduğumuz məlumatlarla kifayətlənirik.
Summativ qiymətləndirmə yekun qiymətləndirmədir. Bu kiçik və böyük summativ olmaqla iki yerə bölünür. Düşünürəm ki, summativ qiymətləndirmə tam ləğv edilə bilməz. Amma sadələşdirilməsi vacibdir. Hansı formanın qəbul ediləcəyini gələcək göstərəcək.
Bir şeyi qeyd etməliyəm ki, əvvəl orta məktəblərdə biliyi qiymətləndirirdik. Artıq bacarıqların qiymətləndirilməsi də önə çəkilir. Bu baxımdan hazırlanacaq yeni qiymətləndirmə sənədlərində bu meyar da nəzərə alınacaq. Qəbul edilsin, ondan sonra qaydaların praktikada özünü doğruldub, doğrultmayacağını analiz edə bilərik”.
Qeyd edək ki, Təhsil Nazirliyinin məlumatına görə, summativ qiymətləndirmə ilə bağlı yeni sənəd layihəsində summativ qiymətləndirmənin sayının əsaslı şəkildə azaldılması əks olunub. Həmçinin gün ərzində keçiriləcək summativlərin maksimum sayı müəyyən edilib. Dövlət İmtahan Mərkəzinin müsbət rəyini alan layihə hazırda aidiyyəti dövlət qurumları ilə razılaşdırma mərhələsindədir.
Aysel Aslan
