"Prezident seçkiləri öncəsi təşviqatla bağlı sosial mediaya sərt yanaşma ortaya qoymaq doğru olmaz”.
Bu barədə "Sherg.az”a Mərkəzi Seçki Komissiyasının sədri Məzahir Pənahovun sosial şəbəkələrdə təşviqat kampaniyası aparılması barədə açıqlamalarını şərh edərkən Azərbaycan İnternet Forumunun prezidenti Osman Gündüz bildirib.
O vurğulayıb ki, sosial medianın seçki prosesində faydalı tərəfləri də yetərincədir:
"Düşünürəm ki, bu sahədə daha da faydalanmaq məsələsini qabartmaq lazımdır. Çünki təşviqat üçün də ən ucuz vasitə, az resurs tələb edən, geniş kütləyə qısa müddətdə çatmağa imkan verən vasitə məhz sosial şəbəkələrdir. Deputatların, nazirlərin özünə, onların komandasına, digər şəxslərə bir qədər məlumat vermək olar ki, sui-istifadə hallarına yol verilməsin. Amma təhqir və böhtanın qarşısı alınmalıdır. İstənilən halda, kimsə öz lehinə, kiminsə əleyhinə nəsə yazacaq deyə, sosial medianı bağlamaq düzgün deyil.
Dünya praktikasında sosial medianın seçkilərdə tətbiqi xüsusi tədqiq olunan sahədir. O mövzular ətrafında elmi araşdırmalar aparılır, dissertasiyalar yazılır. Məsələn, belə bir doktorluq işi ilə rastlaşmışam: "Obamanın prezident seçilməsində "Faccebook" və "Twtitter"dən istifadə". Hesab edirəm ki, sosial medianı təşviq etmək lazımdır ki, bütün seçki prosesindən onun imkanlarından faydalanılsın".
Qeyd edək ki, M. Pənahov sosial şəbəkələrin idarəolunmaz amilə çevrildiyini deyib. O bildirib ki, bəzən kimsə hansısa namizədi tənqid edir, bunun özü də təşviqat sayılır: "Sosial şəbəkələr bizim üçün çox pis vəziyyət yarada bilər. Biz beynəlxalq təşkilatların nümayəndələri ilə bu halda məsləhətləşib namizədlə bağlı addım atacağıq".
Aysel Aslan
