"Bütün ali məktəblərin elmi tədqiqat laboratoriyaları var və bütün kafedralarda alimlər tədqiqat aparırlar”.
Bunu "Sherg.az”a millət vəkili Fuad Muradovun elmlə peşə məktəblərinin birgə fəaliyyətinə dair təklifinə münasibət bildirirkən Azərbaycan Təhsil Şurasının sədri, professor Əjdər Ağayev deyib.
O diqqətə çatıdırıb ki, universitetlərin məqsədi yalnız kadr hazırlamaq deyil, tədqiqatlar aparıb, elmi inkişaf etdirməkdir:
"Məsələn, Bakı Dövlət Universitetinin elmi kadrlarının ərsəyə gətirdikləri elmi ixtiralarını, araşdırma, elmi məqalələrini misal göstərə bilərik. Azərbaycan Milli Elmlər Akademiyası (AMEA) təhsil üçün deyil, onun nəticələri təhsildə istifadə olunur.
Peşə təhsili də elmlə sıx bağlı olmalıdır. Əgər hansısa fəaliyyətin elmi əsası yoxdursa, effektiv də olmaz. Təhsilin mahiyyəti nədən ibrətdir ? Onun bünövrəsində nələr dayanır ? Bax, bunu bilmək lazımdır. Son zamanlar xüsusilə, yeni yaranan özəl universitetlərin fəaliyyətində, təhsil sferasında elmi məsələlər kənarda qalıb. Buna görə, səngimiş məsələləri aktuallaşdırmaq vacibdir.
Ali məktəblərin özünün elmi-tədqiqat institutu, kafedraların laboratoriyaları olmalıdır və var. Onların işlərinin nəticələri ortaya qoyularaq, tədqiq olunmalıdır. Elmi aktuallaşdırmaqla, Elm və Təhsil Nazirliyini təsis etmək mümkündür”.
Qeyd edək ki, millət vəkili Fuad Muradov elmlə bağlı Elmlər Akademiyası və onun institutlarının kompakt şəkildə peşə istiqaməti ilə bağlı olmasından danışıb. Deputatın sözlərinə görə, elmin peşə ilə birlikdə fəaliyyətsiz olması heç bir nəticə verməyəcək.
Aysel Aslan
