""GetContact” kimi proqramların məqsədi daha çox istifadəçi toplamaq, informasiya bazasını genişləndirməkdir”.
Bu barədə "Sherg.az”a son bir neçə gündə sosial şəbəkələrdə müzakirə mövzusuna çevrilən "GetContact” mobil proqramından danışarkən media hüququ üzrə ekspert Ələsgər Məmmədli bildirib.
O qeyd edib ki, heç bir proqram öz şərtlərini təqdim etmədən, istifadəçini xəbərsiz şəkildə qoşa bilməz:
"Proqrama giriş anında onun haqqında istifadə qaydaları, şərtləri, istifadəçinin paylaşacağı məlumatları göstərilir. "GetContact”ı yükləyərkən, istifadəçilər öz telefonlarındakı kontaktlara giriş üçün icazə verirlər. Belə olan halda informasiya kiminsə özünün informasiyası deyil. Sadəcə, məsələn mən kimisə aşağılayıcı şəkildə kontaktıma yazmışam və görülməsinə imkan yaratmışam. Bu, həmin şəxsin özünün paylaşdığı məlumat deyil. Burada məsuliyyət proqramın deyil, mənimdir. Proqram əvvəldən şərtlərlə bağlı məlumat verməsə, qeydiyyat icazəsi almasa, onu tənqid etmək olar. Pulsuz şəkildə tətbiq edilən bu proqramlar könüllü istifadə üçün nəzərdə tutulub.İnsanların maariflənməsinə gəlincə, hər kəs arzu etmədiyi hallarla qarşılaşa biləcəyini anlamalıdır. Bunu dərk edib, proqrama qoşulsalar problem olmaz. Mən də proqramda şahidi olmuşam ki, müxtəlif formatda yazılmış adlar görünür. Müxtəlif telefonlarda mobil nömrələrin necə yazılması bilavasitə həmin şəxslərin proqrama qoşularkən verdiyi razılıqdır”.
Qeyd edək ki, "GetContact” proqramı başqalarının adınızı telefonunda necə yazdığını müəyyən edir və sizə göstərir. Belə ki, "Play Store”dan "GetContact” proqramını yükləyərək, sadə istifadə qaydalarını tətbiq etməklə bunu öyrənmək olar.
Aysel Aslan
